Маск се враќа дома, во „Тесла“. Акционерите воодушевени

Илон Маск вети дека „значително“ ќе се повлече од својата работа со американската влада и ќе се фокусира на компанијата „Тесла“, со што ја ублажи загриженоста на инвеститорите, кои неговата работа во Вашингтон ја гледаа како пречка.

Главниот извршен директор ќе „ѝ посвети многу повеќе време на ’Тесла’“ од следниот месец, рече тој во вторникот и додаде дека неговото раководење со Одделот за ефикасност на владата (DOGE) главно ќе биде завршено.

Инвеститорите и аналитичарите сè почесто го повикуваат Маск да се фокусира повторно на компанијата за електрични возила, која се соочува со пад на продажбата и зголемени трошоци поради трговската војна на претседателот Доналд Трамп. Во последните месеци се појавија протести што се резултат на јавното противење на владината улога на Маск.

По млакиот почетен одговор на резултатите на „Тесла“ од првиот квартал, кои открија длабоки предизвици во автомобилскиот и енергетскиот сегмент на компанијата, цената на акциите вчера скокна речиси за пет проценти. Компанијата за првиот квартал пријави приспособена добивка од 27 центи по акција, што е под просечната процена на аналитичарите, и истовремено ја напушти претходната прогноза дека продажбата годинава повторно ќе расте.

Волстрит стана непријателски настроен кон политичката активност на Маск, која ги отуѓи клучните купувачи и сериозно ја оштети сликата на брендот. Личното богатство на Маск годинава се намали за повеќе од 130 милијарди долари поради падот на вредноста на акциите на „Тесла“.

Продажен салон на „Тесла“ во Валенсија Bloomberg

Промашени процени „Тесла“ за првиот квартал пријави приходи од 19,34 милијарди долари во споредба со 21,43 милијарда долари (процена на „Блумберг“), што е значително под 21,3 милијарда долари, колку што пријави пред една година. „Тесла“ објави приспособена добивка по акција од 0,27 долари во споредба со проценетите 0,44 долари. „Тесла“ соопшти дека плановите за нови достапни возила се на вистинскиот пат за почеток на производството во првата половина на 2025 година и дека сè уште очекува почеток на масовно производство на роботаксија во 2026 година.

 

Џин Манстер, главен партнер во ДАМ (Deepwater Asset Management), рече дека завршувањето на работата на Маск за DOGE е „доста едноставна математика“, бидејќи побарувачката за возила опаѓа.

„Клучниот елемент за закрепнување на брендот е да се повлече од DOGE – тоа беше минималната потребна доза“, вели Манстер.

Брајан Малбери, управител на портфолија во „Закс“ (Zacks), изјави дека „дефинитивно е добредојдена веста оти Илон наскоро ќе се врати во својата вообичаена улога како извршен директор на неговите компании“.

Компанијата соопшти дека „спроведува внимателни инвестиции што ќе го подготват“ автомобилскиот бизнис за раст. Тоа ќе зависи од фактори како што се зголемувањето на производството и „поширокото макроекономско опкружување“.

Маск за време на конференцискиот повик додаде дека се залагал за пониски царини – што укажува на неговото несогласување со Трамп по ова прашање. Потезите на Трамп за зголемување на американските царини на странски стоки ги исплашија инвеститорите и предизвикаа загриженост за повисоки цени за американските потрошувачи. Маск изјави дека одлуките за царините „се целосно во надлежност на претседателот“.

Маск изјави дека ќе продолжи да соработува со администрацијата на претседателот Трамп „до крајот на претседателскиот мандат“, но во поограничен обем. Веќе се приближува до ограничувањето од 130 дена, кое е утврдено за неговата улога како специјален владин службеник.

Царините на Трамп ги заострија предизвиците за „Тесла“ и ги загрозуваат автомобилските синџири на снабдување во светот, зголемувајќи ги трошоците во целата индустрија. Иако „Тесла“ треба да биде релативно помалку погодена од другите производители на автомобили поради своите големи фабрики во Калифорнија и во Тексас, нејзините возила сепак содржат некои компоненти што не се од САД, а компанијата предупреди на можниот ефект.

Маск им кажа на аналитичарите дека „Тесла“ работи на локализација на синџирите на снабдување за да ја поедностави логистиката и да ги намали ризиците од повисоки трошоци.

„Ние сме компанија со најмалку проблеми во врска со царините“, рече тој, но нагласи дека тие сè уште се тешко управливи. „Тоа нè става во посилна позиција од нашите конкуренти“.

Бен Кало, виш истражувачки аналитичар во „Бајрд“ (Baird), изјави дека споменувањето на царините претставува начин на кој компанијата ги предупредува креаторите на политики за болките што ги предизвикуваат давачките.

„Тоа е начин да се пренесе пораката дека царините ќе влијаат на Илон, без тој да го каже тоа како дел од американската влада“, рече Кало. „Тој оди по тенка жица, бидејќи сè уште е дел од владата преку DOGE“.

Царините ќе имаат „релативно поголем ефект“ врз енергетскиот бизнис отколку врз автомобилскиот, рече тој. Компанијата во своите системи за складирање енергија „Магапек“ (Megapack) се потпира на литиум-јонски батериски ќелии од Кина, која во 2024 година претставуваше 84 проценти од светскиот производствен капацитет на литиум-јонски батерии, според истражувачката компанија „Вуд Мекензи“ (Wood Mackenzie). Во споредба со тоа, Северна Америка претставуваше само пет проценти.

Одговор на потрошувачите 

Поддршката на Маск за контроверзни политички ставови во Европа и блиските врски со Трамп предизвикаа глобални реакции. Продажните салони и станиците за полнење на „Тесла“ станаа цел на протести и вандализам, особено во САД. „Тесла тејкдаун“ (Tesla Takedown), протестна група што го обвинува Маск за штета на демократиите низ светот, ги охрабрува луѓето да ги продаваат своите „тесли“ и акциите на компанијата, истовремено осудувајќи ги насилството и вандализмот.

Аналитичарот на „Ведбуш секјуритис“ (Wedbush Securities), Ден Ајвс, на почетокот на неделава напиша дека Тесла се соочува со „можно трајно уништување на побарувачката од 15 до 20 проценти кај идните купувачи на ’Тесла’ поради штетата што Маск му ја нанесе на брендот со DOGE“.

Компанијата изјави дека „промената на политичкото расположение“ е уште еден фактор што би можел „во блиска иднина значително да влијае на побарувачката за нашите производи“.

Маск им кажа на аналитичарите дека протестите против неговата компанија се „организирани и платени“, но не даде никакви детали или докази.

Во електронски одговор на изјавите на Маск, претставникот на групата „Тесла тејкдаун“ изјави дека движењето „не плаќа протестанти“.

„Домаќините и учесниците се пријавуваат доброволно, бидејќи веруваат во демократијата и владеењето на правото, а не затоа што ги плаќа некој непознат милијардер“, соопшти групата. „Иронијата е очигледна, бидејќи доаѓа од човек што потрошил 277 милиони долари за изборот на Доналд Трамп и 21 милион долари за неуспешен обид да влијае на резултатите во Висконсин за своја корист“.

Optimus I Bloomberg 

Автономија, роботика 

Маск сè повеќе ја насочува иднината на „Тесла“ кон автономијата, како што се таксија без возач и роботика, вклучувајќи го и хуманоидниот робот „Оптимус“ (Optimus).

„Додека продолжуваме да воведуваме иновации за намалување на трошоците за производство и работа, очекуваме дека со текот на времето нашите добивки од хардвер ќе бидат проследени со забрзување на приходите од вештачка интелигенција, софтвер и услуги“, се наведува во презентацијата за акционерите.

„Тесла“ изјави дека новите модели на возила, вклучувајќи ги и достапните, сè уште се на пат да започнат со производство во првата половина од годинава, со што ги отфрли претходните извештаи на „Ројтерс“ за доцнења. „Тесла“ даде малку детали за претстојните возила. Во вторникот Ларс Морави, потпретседател за инженеринг на возила, изјави дека ќе бидат слични на другите модели на „Тесла“.

Производителот соопшти дека веќе ги подготвил своите фабрики за лансирање на новите модели за време на застојот, кога ги преуредувал производствените линии за освежениот „модел уај“ (Model Y).

Маск изјави дека лансирањето на роботаксија ќе започне во јуни во Остин, со 10-20 возила, а потоа постепено ќе се шири.

Во моментов нема коментари за веста. Биди прв да коментира...

Остави коментар