Доналд Трамп го прогласи 3 април за „Ден на ослободување“, односно датум кога Соединетите Американски Држави воведуваат царини од 25 проценти на сите увезени автомобили и автоделови, вклучувајќи ги и електричните возила. Одлуката ќе има глобални последици, особено за европските и азиските производители чии модели се извезуваат на американскиот пазар. Зголемувањето на цените на електричните возила се чини неизбежно, а некои од производителите веќе размислуваат за корекции во производствените планови.
„Блумберг интелиџенс“ (Bloomberg Intelligence) проценува дека дополнителните царини би можеле да избришат до 25 проценти од оперативната добивка на „Мерцедес“ и на „Порше“ до 2026 година. Двете марки извезуваат луксузни модели во САД исклучиво од Европа. Според процените на „Кокс“ (Cox Automotive), цената на електричното возило произведено во САД би можела да порасне за околу 3.000 долари, додека она произведено во Мексико или во Канада би можело да скокне до 6.000 долари.
Дополнителни мерки се најавени доколку Европската Унија и Канада, според толкувањето на САД, со своите заеднички потези ги загрозат американските економски интереси. Се очекуваат и контрамерки, вклучувајќи можни царини на американски производи.
Во контекст на новите правила, сè повеќе добива важност податокот за местото на производство на електричните возила што се продаваат на американскиот пазар. „Електрек“ (Electrek) состави список на електрични автомобили достапни на американскиот пазар, со податок за тоа каде се произведуваат. Царините не се однесуваат само на готови автомобили туку и на делови клучни за електрификација - погонски системи, батерии и електроника. Тоа значи дека и производителите што склопуваат возила во САД, како „Тесла“, влегуваат во зоната на повисоки трошоци бидејќи користат увозни компоненти.
Според достапните податоци, увозот на автомобили од Германија во САД лани достигна 24,8 милијарди долари. Иако некои од производителите веќе имаат фабрики во САД, како БМВ во Јужна Каролина или „Мерцедес“ во Алабама, многу модели од повисока класа сè уште доаѓаат од Европа како целосно составени возила.
Индустријата сега се соочува со реална можност за пад на производството, повисоки цени за крајните корисници и измени во глобалните синџири на снабдување. Долгорочните последици тешко е да се предвидат, но јасно е дека американската царинска политика влегува во нова фаза - онаа во која царините сè повеќе се користат и како инструмент за обликување на индустријата за електрични возила.
.webp){kind=icon}
