text size
„Енскејл“ (Nscale Ltd.), компанијата за облачни компјутерски услуги за вештачка интелигенција, преговара за продажба на компјутерски капацитети на „Антропик“ (Anthropic PBC) во рамки на договор што би можел да вреди околу 45 милијарди долари, според лица запознаени со преговорите.
Компанијата што развива центри за податоци, поддржана од „Енвидија“ (Nvidia Corp.), настојува да склучи втор голем договор со компанијата што стои зад „Клод“ (Claude), за втор објект во својот комплекс со центри за податоци „Монарх“ (Monarch) во Западна Вирџинија, велат изворите. „Антропик“ веќе има склучено договори со „Енскејл“ за инфраструктура вредна до околу 44,6 милијарди долари, според документ поднесен до регулаторот за планираната иницијална јавна понуда на „Енскејл“.
Вториот објект во „Монарх“ би обезбедувал 460 мегавати компјутерска моќ, користејќи ги напредните чипови за вештачка интелигенција „Вера Рубин“ (Vera Rubin) на „Енвидија“, велат дел од изворите. „Антропик“ има и приоритет за очекуваниот трет објект во „Монарх“, додаваат тие.
Договорот би можел да биде финализиран веќе во наредните денови, велат изворите, кои побараа да останат анонимни бидејќи разговорите се приватни. Преговорите се во тек, деталите од планот би можеле да се променат и не се донесени конечни одлуки, велат тие. Претставниците на „Антропик“ и „Енскејл“ одбија да коментираат.
Уште еден договор што чини повече милијарди за компјутерски капацитети би ги зајакнал изгледите за иницијалната јавна понуда на „Енскејл“, која цели кон вреднување од околу 30 милијарди долари при своето деби на берзата. Група инвеститори ја повикале компанијата да го намали целното вреднување за иницијалната јавна понуда, објави „Блумберг њуз“ (Bloomberg News).
„Антропик“, која е еден од најголемите клиенти на „Енскејл“, стана голем клиент и за давателите на услуги со центри за податоци воопшто. Меѓу договорите што ги склучила се договор од 50 милијарди долари со „Флуидстек“ (Fluidstack Ltd.), од 10 милијарди долари со инфраструктурниот стартап „Волта инфраструктура“ (Volta Infrastructure Holdings Ltd.) и од 45 милијарди долари со „Спејсекс“ (SpaceX) на Илон Маск.
Комплексот „Монарх“ на „Енскејл“ во Западна Вирџинија може да се прошири на вкупна моќност од повеќе од осум гигавати кога ќе биде завршен, покажуваат документите за ИПО-то.
Првично се очекуваше дел од комплексот „Монарх“ да биде изнајмен од „Мајкрософт“ (Microsoft Corp.), која во март објави дека потпишала писмо за намери за планираниот центар за податоци. Но „Мајкрософт“ летово се повлече од локацијата во Западна Вирџинија, овозможувајќи ѝ на „Антропик“ (Anthropic) да стане закупец, објави „Блумберг њуз“ (Bloomberg News).
„Антропик“, која во мај беше проценета на 965 милијарди долари, се очекува во наредните месеци да спроведе сопствена иницијална јавна понуда што потенцијално би можела да урне рекорди, а продолжува да бара дополнителни компјутерски капацитети за да го одржи растот.
Инвеститорите стануваат сè попретпазливи поради огромните суми што се позајмуваат за финансирање на бумот на центрите за податоци за вештачка интелигенција, губејќи го интересот за сè, од акциите на производителите на чипови до долгот на компаниите за облачни компјутерски услуги.
„Енскејл“ во септември јавно поднесе барање за котација во САД, а сè уште не го започнала официјалното претставување на понудата пред инвеститорите, иако истекол задолжителниот период на чекање од 15 дена. Компанијата работи на забелешките на американската Комисија за хартии од вредност во врска со поднесената документација и има намера да го започне претставувањето откако тие ќе бидат разрешени, изјавија лица запознаени со прашањето.
Компанијата минатиот месец собра 3,36 милијарди долари во рунда на финансирање пред иницијалната јавна понуда, предводена од „Трд поинт“ (Third Point) на Ден Лоуб, со учество на инвеститори меѓу кои „Енвидија“ (Nvidia), „Аполо“ (Apollo Global Management Inc.), „Ситадел“ (Citadel), „Хадсон беј капитал“ (Hudson Bay Capital) и Инвестицискиот совет на Абу Даби.
.webp){kind=icon}
