„Енвидија“ и „Дојче телеком“ вложуваат една милијарда евра во германски дата-центар

„Енвидија“ (Nvidia Corp.) и „Дојче телеком“ (Deutsche Telekom AG) се подготвуваат да ги објават плановите за изградба на центар за податоци во вредност од една милијарда евра во Германија, како дел од поширока иницијатива за развој на инфраструктура за системи со вештачка интелигенција (ВИ) низ Европа.

Двете компании ќе обезбедат средства за проектот вреден 1,2 милијарда долари, велат добро упатени извори. Компанијата САП (SAP SE), најголемиот европски софтверски гигант, ќе ги користи услугите на новиот центар, велат истите извори.

Главниот извршен директор на „Дојче телеком“, Тим Хетгес, извршниот директор на „Енвидија“, Џенсен Хуанг, извршниот директор на САП, Кристијан Клајн, и германскиот министер за дигитализација Карстен Вилдбергер се очекува да ги објават плановите на настан во Берлин следниот месец.

Европските креатори на политики и технолошките извршни директори со месеци зборуваат за потребата регионот да развие сопствен екосистем за ВИ и да го достигне темпото на САД и Кина. Само во САД компании како „Мајкрософт“ (Microsoft Corp.) и „Гугл“ (Google) на „Алфабет“ (Alphabet Inc.) вложуваат стотици милијарди долари во градење капацитети за компјутерска обработка заснована на ВИ.

Хуанг од „Енвидија“ и други претходно ја критикуваа Европа дека е премногу бавна во развојот на сопствена инфраструктура и во поддршката на компании што сакаат да користат ВИ, а притоа да ги задржат своите податоци во рамките на регионот.

Американските депозитарни записи на „Дојче телеком“ пораснаа до 2,2 отсто по објавата, достигнувајќи највисоко дневно ниво.

Дури и центарот за податоци од една милијарда евра што го планираат „Енвидија“ и „Дојче телеком“ бледее во споредба со гигапроектите што денес се најавуваат низ светот. Додека германскиот објект ќе користи околу 10.000 напредни чипови познати како графички процесори (GPU), еден единствен центар во Тексас што го развиваат „Софтбанк“ (SoftBank Group Corp.), „Опен еј-ај“ (OpenAI) и „Оракл“ (Oracle Corp.) се очекува да опфати околу 500.000 GPU-чипови.

„Дојче телеком“, „Енвидија“ и САП не дадоа официјални изјави, а германското министерство за дигитализација не одговори веднаш на барањето за коментар. Компаниите планираат центарот да го изградат во Минхен, наведува изворот.

Европската Унија во февруари објави план вреден 200 милијарди евра за поддршка на развојот на вештачката интелигенција во регионот, со цел во следните пет до седум години трипати да се зголемат капацитетите за работа на вакви системи. „Дојче телеком“ учествува во разговори и со други компании за вклучување во иницијативата за изградба на т.н. ВИ-гигафабрики. Но, процесот напредува бавно – Унијата сè уште не ги утврдила критериумите за разгледување на понудите и распределба на средствата.