Понудата на „Хуавеј“ за ВИ дата-центар во Египет поттикна американска контрапонуда

„Хуавеј“ (Huawei Technologies Co.) поднесе понуда за изградба на ВИ дата-центри за египетската влада, покажувајќи ги своите глобални амбиции во областа на чиповите и предизвикувајќи тревога во Вашингтон, каде што претставниците работат на составување контрапонуда.

Во тендерската понуда, најголемиот кинески конкурент на „Енвидија“ (Nvidia Corp.) предложи извоз на 1.408 од своите најнапредни чипови од серијата Aсценд 950 за облак за тренирање ВИ, и уште 600 од тие чипови или од претходниот модел 910Б, кои би се користеле за два кластера за инференција - потребни за работа на ВИ-моделите откако ќе бидат обучени, велат извори запознаени со прашањето и покажуваат документите што ги прегледа „Блумберг њуз“ (Bloomberg News). „Хуавеј“ претстави 12-месечен план за изградба на инфраструктурата, покажуваат документите.

Доколку биде успешен, проектот би означил ран напредок во кинеската кампања за оспорување на американската доминација во глобалната ВИ-инфраструктура. Тој би го направил „Хуавеј“ клучен снабдувач со ВИ за втората по големина економија во Африка и би му обезбедил упориште на Блискиот Исток, каде што САД агресивно инвестираа во попрофитабилните пазари на ВИ дата-центри во Обединетите Арапски Емирати и Саудиска Арабија. Тоа би можело да биде и првиот познат извоз на акцелераторите Aсценд на „Хуавеј“ по повеќе од една година обиди.

„Хуавеј“ одби да коментира, а египетското Министерство за надворешни работи не одговори на прашањата.

Кога администрацијата на претседателот Доналд Трамп дознала за понудата, Стејт департментот контактирал со компании, меѓу кои „Енвидија“, „АМД“ (Advanced Micro Devices Inc.) и „Мајкрософт“ (Microsoft Corp.), за да состават американски конзорциум кој би ѝ конкурирал на понудата на „Хуавеј“ за ВИ-чипови, рекоа некои од изворите, кои побараа да останат анонимни. „Мајкрософт“ одби да коментира, додека „Енвидија“ и „АМД“ не одговорија.

Тимот на Трамп, исто така, го предупреди светот дека користењето одредени акцелератори на „Хуавеј“ без одобрение од Вашингтон би можело да резултира со правни казни, иако не е јасно дали претставниците се повикале на тоа предупредување во разговорите со Каиро.

Египет сега стана најновото поле за надмудрување на доминантните светски технолошки сили, нагласувајќи го геополитичкиот предизвик со кој се соочуваат земјите од Глобалниот Југ што сакаат свој дел од ВИ. Тендерската постапка можеби е првпат САД и Кина директно да се натпреваруваат за ист владин проект за ВИ дата-центар. Нејзиниот исход ќе биде тест за способностите на чиповите на „Хуавеј“, новите напори на Трамп за дипломатија со полупроводници на пазарите во развој и способноста на Египет да се движи меѓу различни екосистеми, истовремено задржувајќи ја контролата врз својата ВИ-иднина.

„Египет е една од десетиците земји со кои разговараме за американското технолошко лидерство во вештачката интелигенција“, рече портпарол на Стејт департментот. „Американската ВИ му носи придобивки на светот“, додаде портпаролот. САД „се подготвени да соработуваат со земјите во развојот и примената на ВИ на начини што го почитуваат суверенитетот и ги прошируваат капацитетите“.

Стратегијата на „Хуавеј“ во Африка и на глобално ниво тесно ги следи дипломатските врски на Пекинг со одделни земји, вели извор запознаен со размислувањата на компанијата. Следната недела, кинескиот лидер Шји Џјинпинг треба да го посети Египет првпат по повеќе од една деценија.

„Хуавеј“, со седиште во Шенжен, широко им се додворува на африканските влади, меѓу кои Египет и Кенија, како клиенти во области како образованието и здравството, рече изворот. Во Кенија се наоѓа американски дата-центар кој се соочува со тешкотии, а кој беше главен пример за ВИ-дипломатијата на администрацијата на Бајден на континентот.

Предлогот на „Хуавеј“ за Египет вклучува партнерство со „Ајфлајтек“ (iFlytek Co.), кинескиот гигант за надзор, кој заедно со „Хуавеј“ е на американската црна листа од 2019 година. Меѓу понудите на компаниите се препознавање возила и поединци врз основа на национална база на податоци за населението, како и поширока „свесност за ситуацијата“ - спакувани во „панорамски приказ на градот на еден екран“. На еден слајд од презентацијата од 102 страници, примерите за „основни видеоапликации“ содржат ознаки на кинеското Министерство за јавна безбедност. „Ајфлајтек“ не одговори на барањето за коментар.

Не е јасно кои апликации, доколку воопшто има такви, би ги истакнала американската понуда - ниту дали има намени што американската влада би ги ограничила. За испораките на ВИ-чипови во Египет е потребно одобрение од Вашингтон од 2023 година, што му дава на тимот на Трамп можност да поставува услови преку процесот за издавање извозни дозволи.

Понудата на „Хуавеј“ се надоврзува на повеќедецениското присуство во Египет, северноафриканска земја со повеќе од 100 милиони жители, која во последните години постојано ја продлабочува соработката со Кина, од трговијата до воените вежби. Добивањето на договорот за дата-центарот би го зајакнало присуството на „Хуавеј“ во регион кој е клучен за неговата глобална визија - и би покажало дека навистина постои странска побарувачка за неговите ВИ-чипови, кои значително заостануваат зад оние на „Енвидија“ по обем и способности.

Американските компании за ВИ-инфраструктура, во меѓувреме, историски не го сметале Египет за целен пазар, ниту земјата била меѓу главните приоритети во напорите на Трамп за ВИ-дипломатија. Фактот што Египет одеднаш се најде во разговорите за извоз на ВИ-чипови го нагласува степенот на загриженост на Вашингтон поради глобалното ширење на кинескиот ВИ-хардвер, особено откако тимот на Трамп се обиде да го престигне напредувањето на Кина со контроверзни промени во политиката за други делови од Блискиот Исток.

Сепак, 2.008 чипови се релативно мала количина. Според вообичаените параметри за тренирање ВИ-модели, толкава количина акцелератори „Хуавеј 950ДТ“ би обезбедила приближно исти способности како неколку стотици од најмоќните комерцијално достапни чипови на „Енвидија“. Тоа е за неколку редови на големина помалку од количината компјутерска моќ што западните компании редовно ја користат.

Сепак, за „Хуавеј“ - кој поради американските ограничувања за купување клучна производствена опрема тешко произведуваше големи количества ВИ-чипови, но сега го зголемува производството - успешната продажба би претставувала потврда и на страната на побарувачката и на страната на понудата.

Минатата година, кога „Хуавеј“ се обидуваше да ги привлече земјите од Персискиот Залив и Југоисточна Азија со понуди од по неколку илјади процесори, беше подготвен да ги продава само своите тогаш втори најдобри чипови - бидејќи производството на подобриот модел 910Ц сè уште беше премало. „Блумберг“ тогаш објави дека се чини оти „Хуавеј“ нема реализирано ниту еден извоз на Асценд, а нема јасни показатели дека тоа се променило.

Сега „Хуавеј“ му ги нуди на Египет своите најмоќни процесори, кои се помоќни од 910Ц. „Хуавеј“ ги промовираше тие чипови 950ДТ и на настан во Јужна Кореја минатата година, објавија локалните медиуми, а претседателот на неговиот бизнис со облак-услуги во Латинска Америка изјави за „Саут Чајна морнинг пост“ (South China Morning Post) дека компанијата разгледува дали да ги понуди акцелераторите и таму.

Токму за ваквата извозна стратегија предупредуваа „Енвидија“ и нејзините политички сојузници. Засега бројките се мали, а барањето странски клиенти не значи дека „Хуавеј“ успеал да ја задоволи побарувачката на домашниот пазар, каде што компании како „Дипсик“ (DeepSeek) и „Муншот“ (Moonshot) сè уште се потпираат на хардверот на „Енвидија“.

Но понудата за Египет е доказ за растечката самоувереност на телекомуникацискиот гигант, кој ја има целосната поддршка од Пекинг да ѝ конкурира на „Енвидија“ - и дома и во странство. Всушност, малите почетни испораки, осмислени за стекнување упориште особено на нетрадиционалните пазари, се повторување на стратегијата што го направи „Хуавеј“ водечки светски снабдувач со телекомуникациска опрема.

Вашингтон, во меѓувреме, немаше илузија дека дури и агресивните ограничувања за опремата за производство на чипови можат целосно да го запрат напредокот на „Хуавеј“ во ВИ-полупроводниците. Но, откако извлече поуки од битките околу мрежната опрема, тимот на Трамп се обиде уште во почеток да го спречи проблемот со извозот на ВИ-чипови - делумно преку своите насоки против „Хуавеј“.

Тоа предупредување се потпира на сложени екстериторијални овластувања што предизвикаа немалку зачудени реакции кај други влади - но сепак се покажаа како ефикасно средство за одвраќање. Малезија минатата година најави национален ВИ-систем базиран на чипови на „Хуавеј“, со сличен обем како предлогот на „Хуавеј“ за Египет, но потоа брзо се дистанцираше од проектот поради загриженоста на Белата куќа.

„Малезија останува посветена на целосно почитување на сите важечки закони за контрола на извозот“, соопшти тогаш Министерството за инвестиции на земјата. „Малезија, исто така, го потврдува своето суверено право да ги формулира своите политики во согласност со националниот интерес.“

Иако Малезија е меѓу најбрзорастечките пазари за ВИ дата-центри во светот, екосистемот на Египет - а всушност и на цела Африка - е многу помал. Втората национална стратегија за ВИ на земјата има цел технологијата да придонесува со 7,7 отсто во БДП до 2030 година.

Физичката инфраструктура е суштински дел од таа визија - а бидејќи Египет не произведува сопствени ВИ-чипови, мора да ги набавува или од САД или од Кина. Кина до неодамна не беше подготвена да ги продава овие процесори. САД, во меѓувреме, го ограничуваат извозот во Египет и во околу 40 други земји од 2023 година, надоврзувајќи се на контролите за Кина воведени една година претходно.

Минатата година тимот на Трамп го укина планот од времето на Бајден за глобално проширување на тие ограничувања, во голема мера за да избегне ненамерно да му ги препушти глобалните пазари на „Хуавеј“. Египет, сепак, останува под ограничувања. Но тоа не мора да значи дека било пречка за развојот на неговата ВИ-инфраструктура. Напротив, земјата едноставно не беше значаен комерцијален фокус за „Енвидија“ или „АМД“.

Администрацијата на Трамп има план и за земји како Египет: програма за поттикнување на извозот чија цел е да понуди сеопфатни ВИ-решенија со финансирање од американската влада - насочена кон земјите од Глобалниот Југ кои инаку би можеле да се одлучат за поевтини кинески опции или каде што американските компании можеби не гледаат доволно силна деловна оправданост без одредена федерална поддршка.

Портпаролот на Стејт департментот посочи на таа иницијатива, која беше започната пред повеќе од една година, но сè уште нема резултирано со ниту еден договор, кога беше прашан за американскиот предлог за Египет. Портпаролот не одговори директно дали конкретно за Египет е предвидено федерално финансирање.

-Со помош на Гао Јуан и Мет Деј