„Порше“ и „Дојче телеком“ сакаат да инвестираат во одбранбен фонд од 500 милиони евра

„Порше СЕ“ (Porsche Automobil Holding SE) и „Дојче телеком“ (Deutsche Telekom AG) водат разговори за да станат главни инвеститори во нов фонд за ризичен капитал, насочен кон европски компании за одбранбена технологија, чија цел е да собере 500 милиони евра (586 милиони долари).

Според лица запознаени со плановите, со новиот фонд ќе управува ДТЦП (DTCP GmbH), инвестициска компанија со седиште во Хамбург, која до пред една деценија беше дел од „Дојче телеком“. Истите извори велат дека големината и составот на фондот сè уште може да се променат.

„Порше СЕ“, холдинг-компанијата на семејството милијардери што ги контролира производителите на автомобили „Порше АГ“ и „Фолксваген АГ“ (Volkswagen AG), соопшти дека ќе формира фонд за вложувања во одбранбената индустрија, со цел да го искористи растот на воената потрошувачка во Европа. За таа цел, компанијата се откажа од претходното ограничување да инвестира само во фирми што развиваат технологии со двојна намена – за цивилна и воена употреба.

Портпаролите на „Порше СЕ“, „Дојче телеком“ и ДТЦП одбија да дадат изјава. Инвеститорите во ризичен капитал во Европа сè поактивно се насочуваат кон одбранбениот сектор, откако континентот одвои стотици милијарди евра за повторно вооружување, поттикнато од целосната руска инвазија врз Украина и зголемените сомнежи околу посветеноста на САД кон НАТО. Компании како „Лејкстар“ (Lakestar), „Тикехо капитал“ (Tikehau Capital) и „Си-ви-си капитал партнерс“ (CVC Capital Partners) собираат капитал и формираат тимови за склучување договори во индустрија што долго време беше непопуларна поради етички и деловни ограничувања.

И покрај зголемената активност, европските стартапи во одбранбената индустрија сè уште во голема мера зависат од американски капитал, делумно поради тоа што регулативата за вложувања во оружје традиционално го попречувала приливот на средства во секторот. Тоа почнува да се менува, откако јавни финансиски институции како Европскиот инвестициски фонд (European Investment Fund) и КфВ (KfW), неодамна ги ублажија своите политики.

„Порше СЕ“ има постојно партнерство со ДТЦП. Во 2023 година инвестираше во фонд за растечки капитал на ДТЦП, а минатата година двете страни го формираа фондот за ризичен капитал „Инчарџ капитал партнерс“ (Incharge Capital Partners), каде што „Дојче телеком“ е исто така инвеститор.

„Порше“ и ДТЦП досега имаат вложувано во технологии со двојна намена преку германскиот производител на дронови „Квантум системс“ (Quantum Systems), кој во мај собра средства, при што вредноста на компанијата беше проценета на над 1 милијарда долари. „Дојче телеком“ е главен инвеститор во ДТЦП.

Во моментов нема коментари за веста. Биди прв да коментира...

Остави коментар