Акциите од одбранбената индустрија во Европа достигнаа нов рекорд

Европските акции за одбрана, кои веќе извесен период имаат висок раст, денеска добија уште еден поттик откако Велика Британија ги откри плановите за проширување на својата флота на подморници и зајакнување на својата нуклеарна моќ за одвраќање.

Акциите на „Бебкок интернешнел груп“ (Babcock International Group Plc), компанија за одбранбени услуги што ја поддржува флотата на подморници на Велика Британија, се зголемија дури за шест проценти, достигнувајќи осумгодишен максимум. Велика Британија планира да инвестира 15 милијарди фунти (20 милијарди долари) во својата програма за нуклеарни боеви глави и да изгради дури 12 подморници.

На други места во Европа акциите на доставувачот на делови за тенкови „Ренк груп“ (Renk Group AG) пораснаа за 2,1 отсто, а на производителот на оклопни возила „Рајнметал“ (Rheinmetall AG) се зголемија за 1,4 отсто.

„Хенсолт“ (Hensoldt AG), компанија специјализирана за одбранбена електроника, забележа раст на акциите од 8,8 проценти по подобрувањето на прогнозите од аналитичарите на „ЏП Морган Чејс“ (JPMorgan Chase & Co). Акциите на ова трио се со најдобри перформанси во европскиот индекс Stoxx 600 годинава.

Bloomberg Mercury

 

Одбранбениот сектор доживува силен раст откако европските земји ветија дека ќе ги зголемат воените трошоци под притисок од американскиот претседател Доналд Трамп. Кошницата на акции од европскиот сектор за одбрана на „Голдман Сакс“ (Goldman Sachs Group Inc) денеска достигна нов рекорден максимум, со што годинашните добивки достигнаа околу 120 проценти. Процената на „Блумберг“ за секторот исто така достигна нов врв.

Велика Британија ќе се префрли во позиција на „подготвеност за војна“ како одговор на растечките закани и поголемата нестабилност во светот, изјави премиерот Кир Стармер.

Во моментов нема коментари за веста. Биди прв да коментира...

Остави коментар