Оптимизмот за Европа се врати на нивото пред војната со Иран

Инвеститорите сè повеќе им даваат предност на европските акции во однос на американските, бидејќи силните економски изгледи на регионот стануваат попривлечни во време на нагло зголемување на трошоците за ВИ.

Околу 47 отсто од менаџерите на фондови во анкета на „Банката на Америка“ (Bank of America Corp.) очекуваат приносите на европските акции умерено да ги надминат оние во САД во текот на следната година, што е највисоко ниво откако војната со Иран започна во февруари.

Оптимистичкиот став е поткрепен со тоа што околу 97 отсто од учесниците велат дека не очекуваат рецесија во Европа, што е највисоко ниво од 2007 година. Во меѓувреме, повеќе од три четвртини изјавиле дека натамошниот раст на акциите главно ќе биде поттикнат од нагорни ревизии на прогнозите за заработката.

„Повторно се навраќаме на темата за Европа од почетокот на годината, која нагло беше запрена од војната со Иран“, вели Андреас Брукнер, стратег во „Банката на Америка“.

Оптимизмот за европските акции се врати на нивото пред војната со Иран

Околу 47 отсто од инвеститорите очекуваат европските акции да ги надминат американските во следната година

Забелешка: Последната анкета е спроведена меѓу 7 и 13 август и опфатила 98 учесници кои управуваат со средства во вредност од 272 милијарди долари/Извор: Bank of America Corp.

Европските акции овој месец достигнаа рекордни нивоа по најдобрата сезона на корпоративни резултати во речиси четири години. Индекс на „Ситигруп“ (Citigroup Inc.) покажува дека постои и остра разлика во динамиката на раст меѓу Европа и САД: додека економските показатели во регионот ги надминуваат прогнозите најмногу од февруари 2023 година, американските показатели, како што се продажбата на мало и вработеноста, потфрлија во последните објави.

И иако растот на акциите ги зголеми вреднувањата во Европа, за некои инвеститори тоа е оправдано и претставува попривлечна причина за купување отколку едноставно фактот дека европските акции се поевтини од американските. Stoxx 600 сега се тргува по 15 пати од очекуваната заработка, при што разликата во вреднувањето во однос на S&P 500 е најмала од февруари 2022 година.

„Пониското вреднување во однос на САД сè уште е прилично привлечно, но се чини дека пазарот се оддалечува од приказната заснована исклучиво на вреднувањето и повеќе размислува за заработката и приходите, што е позитивно“ рече Џастин Онуеквуси, главен инвестициски директор во „Сент Џејмсис“ (St. James’s Place). Тој има поголема изложеност кон европските акции, додека има негативен став кон американските.

Економската динамика ѝ оди во прилог на Европа во однос на САД

Динамиката на растот се засилува во Европа, а слабее во САД

Извор: Citigroup Inc.

Сепак, неодамнешниот скок на приносите на обврзниците го става оптимизмот на тест. Трошоците за долгорочно задолжување на Франција оваа недела достигнаа највисоко ниво од 2008 година, додека оние во Германија се на нивоа од 2011 година. Причина за тоа се континуираниот раст на цените на нафтата и загриженоста за инфлацијата, додека трајното примирје меѓу САД и Иран и натаму останува недостижно.

Bloomberg

Stoxx 600 не успеа да напредува во август и заостанува зад растот на S&P 500 од 2,7 отсто, откако два месеца по ред имаше подобри резултати. Анкетата на „Банката на Америка“ покажа дека повеќе од половина од учесниците очекуваат повисоки каматни стапки на Европската централна банка во текот на следната година. Сепак, тоа не мора нужно да доведе до распродажба на акциите. Историјата покажува дека акциите можат да продолжат да растат сè додека економскиот раст ги поддржува повисоките каматни стапки.

Загриженоста околу огромните трошоци за вештачка интелигенција кај најголемите американски технолошки компании, исто така, им дава предност на европските акции. Наместо во нив да доминираат компании кои многу трошат, водечките индекси во регионот се силно насочени кон сектори што ја овозможуваат оваа технологија, како што се инфраструктурата и зелената енергија, како и кон акции на компании кои би можеле да имаат корист од примената на ВИ.

„Помалку популарните циклични компании се интересни бидејќи не се ВИ, заработуваат пари и се отпорни - токму тоа е начинот да се диверзифицираат сите тие профити од ВИ“, рече Алпеш Пател, управувачки партнер во „Рутбриџ капитал“ (RootBridge Capital).

За Медисон Фалер, глобален инвестициски стратег во „ЏП Морга“ (JPMorgan Private Bank), по овогодишниот раст клучен е внимателниот избор. Таа им дава предност на европските финансиски и индустриски компании, кои би имале корист од поповолното економско опкружување. Фалер, исто така, претпочита компании со физички средства што тешко можат да се заменат и кои се помалку ранливи на нарушувањата предизвикани од ВИ.

Податоците за позиционирањето покажуваат дека инвеститорите имаат дополнителен простор за купување европски акции. Анкетата на „Банката на Америка“ покажа дека нето шест отсто од менаџерите на фондови имаат поголема изложеност кон акциите од еврозоната, што сè уште е малку под долгорочниот просек. Од друга страна, изложеноста кон американските акции е највисока од декември 2024 година, околу 1,5 стандардни девијации над просекот.