text size
Претседателот Доналд Трамп го одби предлогот на Иран за повторно отворање на теснецот Ормуз, додека главниот град на Саудиска Арабија беше цел на напад од јеменските Хути за време на викендот. Од другата страна, Иран соопшти дека очекува конечен одговор од САД, но нема да ги ублажи своите услови.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Македонија и регионот речиси не постојат на европскиот радар на приватен капитал
Хрватска, Словенија, Србија, Босна и Херцеговина и Северна Македонија речиси и да не постојат на радарот на приватен капитал (private eqiuty) на европско ниво. Регионот Адрија е дел од пошироката слика за Централна и Источна Европа (ЦИЕ) – регион што учествува со само 1,9 проценти од вкупните европски инвестиции во приватен капитал, а Хрватска, Словенија и Србија се наоѓаат дури и под тој скромен просек.
Станува збор за пазари каде што приватниот капитал штотуку почнува да добива сериозен замав, а ограничената институционална активност што постои често зависи од изолирани, поединечни трансакции кои можат драстично да ја променат годишната статистика на земјата.
Што се крие зад растот на биткоинот: Крај на мечкиниот пазар или само кратка издишка?
Биткоинот повторно го привлече вниманието на инвеститорите со нагло закрепнување во септември, а зад растот стои комбинација од неколку фактори, не еден единствен настан. По падот кон околу 75.000 долари во средината на месецот, најголемата криптовалута се искачи над 87.000 долари на почетокот на минатата недела, достигнувајќи локален максимум, пред повторно да се повлече кон зоната од околу 84.000 долари на крајот од седмицата.
Тоа се нивоа на кои биткоинот се тргуваше и на почетокот на годината, откако цената се спушти од рекордното ниво достигнато во октомври минатата година. Еден од највидливите двигатели на новиот интерес се американските спот биткоин ЕТФ-ови. Само во четвртокот тие привлекле околу 191 милион долари нето-приливи, со што вкупниот прилив во шест последователни трговски сесии надмина 2,8 милијарди долари.
Има 10 отсто шанси ВИ да го уништи човештвото - еве што всушност значи тоа
Истражувач на „Антропик“ (Anthropic) процени дека постои повеќе од 10 проценти шанса вештачката интелигенција (ВИ) да ги убие сите луѓе во следната деценија. Зад оваа изјава стои проблем што е многу поконкретен од сценаријата од научнофантастичните филмови: што се случува кога вештачката интелигенција ќе добие задача, а потоа ќе најде начин да изврши нешто што никој не го предвидел?
Кога Еван Хубингер, водечки истражувач на компанијата „Антропик“, изјави дека лично проценува оти постои повеќе од 10 проценти шанса вештачката интелигенција да го усмрти човештвото во следните десет години, тој не зборуваше за роботи што ќе одлучат да започнат војна со луѓето.
Украинските обврзници нудат висок принос, но и огромен ризик: Како да инвестирате?
Пробивот на бојното поле, финансиската инјекција на ЕУ во износ од 90 милијарди евра одобрена оваа година и договорите за реструктуирање на долгот со доверителите предизвикуваат голем наплив на инвеститори, кои се повеќе се обложуваат на украинскиот долг. Бевме заинтересирани каде малите инвеститори можат да купат украински долг.
За странските малопродажни инвеститори, купувањето украински државни обврзници не е толку едноставно како купувањето државни обврзници на западните влади. „Интерактив Брокерс“ (Interactive Brokers – IBKR) е единствениот популарен нео-брокер кој им овозможува на малите инвеститори да купуваат украински државни обврзници.
ЕУ ги предупреди членките на можна енергетска криза, бара ограничување на побарувачката
Европската унија ги предупреди земјите-членки за можна криза со цените на енергентите предизвикана од конфликтот на Блискиот Исток, барајќи од нив да разгледаат мерки за намалување на побарувачката и да продолжат со полнењето на складиштата за гас пред почетокот на зимата.
Во писмото упатено до министрите за енергетика на блокот од 27 земји, европскиот комесар за енергетика Дан Јоргенсен изјави дека зависноста на регионот од увозни фосилни горива го изложува на нестабилност на енергетските пазари и ги повика националните влади итно да се подготват за грејната сезона. „Се соочуваме со криза на цените поврзана со криза во снабдувањето“, напиша Јоргенсен во писмото, во кое „Блумберг њуз“ имаше увид во саботата.
.webp){kind=icon}
