„Енвидија“ ќе ги финансира чиповите на „Екс еј-ај“ на Маск, договор вреден 20 милијарди долари

Стартапот за вештачка интелигенција на Илон Маск, „Екс еј-ај“ (xAI), собира поголемо финансирање од првично планираното, обезбедувајќи поддршка од инвеститори, меѓу кои е и „Енвидија“ (Nvidia Corp.), со што тековната рунда на финансирање се зголемува на 20 милијарди долари, брифираат добро упатени извори.

Финансирањето вклучува комбинација од капитал и заем преку специјално формирана компанија (SPV) што ќе ги купи процесорите на „Енвидија“ и ќе им ги изнајмува на „Екс еј-ај“ за потребите на проектот „Колосус 2“ (Colossus 2), велат истите извори, кои сакаат да останат анонимни. Станува збор за најголемиот центар за податоци на компанијата, лоциран во Мемфис.

„Енвидија“ вложува до 2 милијарди долари во капиталниот дел од трансакцијата – стратегија со која производителот на чипови го забрзува развојот на вештачката интелигенција кај своите клиенти. Според изворите, напорите за собирање средства на „Екс еј-ај“, за кои „Блумберг“ претходно објави дека изнесуваат половина од оваа сума, може дополнително да се зголемат.

Претставник на „Енвидија“ одби да коментира, додека портпарол на „Екс еј-ај“ не одговори на барањето за изјава. Маск во септември објави на платформата X дека компанијата „во моментов не собира капитал“.

Огромното финансирање претставува најнов чекор во трката за вештачка интелигенција, во која големите технолошки компании инвестираат десетици милијарди долари со забрзано темпо за да изградат инфраструктура неопходна за развој на најнапредните АИ-модели.

На почетокот на неделата, „Опен еј-ај“ (OpenAI) објави договор за повеќегодишна соработка за користење на чиповите на АМД (Advanced Micro Devices Inc.). „Мета платформс“ (Meta Platforms Inc.) во последните неколку месеци склучи зделки вредни повеќе милијарди долари, меѓу кои и пакет финансирање од 29 милијарди долари за изградба на центри за податоци. „Оракл“ (Oracle Corp.), пак, обезбеди 38 милијарди долари преку заемно финансирање за својата инфраструктура.

Финансирањето на „Екс еј-ај“, според изворите, ќе биде поделено на околу 7,5 милијарди долари капитал и до 12,5 милијарди долари заем во рамките на специјално формираната компанија. Оваа компанија ќе ги купи процесорите на „Енвидија“, а стартапот на Маск потоа ќе ги изнајмува чиповите во период од пет години, што ќе им овозможи на финансиските институции на Волстрит да ја повратат својата инвестиција.

Оваа уникатна структура на договорот – при што гаранцијата се заснова на графичките процесори, а не на самата компанија – може да стане модел за други технолошки фирми што сакаат да го намалат изложувањето кон задолжување.

Раководството на „Енвидија“ претходно соопшти дека ќе ја искористи растечката финансиска сила на компанијата за да го забрза воведувањето на вештачката интелигенција во индустријата. Во септември финансиската директорка Колет Крес на конференција организирана од „Голдман Сакс“ (Goldman Sachs) изјави дека компанијата ќе продолжи со откуп на сопствени акции и со стратешки аквизиции каде што е можно, но приоритет останува користењето на готовинските средства за да им помогне на други компании побрзо да ја применуваат АИ-технологијата.

Според изворите, во заемното финансирање учествуваат и „Аполо глобал менаџмент“ (Apollo Global Management) и „Дајаметар“ (Diameter Capital Partners), а според претходните информации на „Блумберг“, водечка улога во капиталниот дел на зделката има „Валор капитал“ (Valor Capital). „Аполо“ истовремено вложува и директно.

Портпарол на „Дајаметар“ одбил да коментира, додека претставници на „Аполо“ и „Валор“ не одговориле на барањата за изјава.

Капацитетот на центрите за податоци се смета за клучен за развој на најсовремените АИ-модели, иако некои од експертите дебатираат колку зголемената пресметковна моќ реално го унапредува развојот на технологијата. Само на пазарот на обврзници во САД, технолошките компании годинава собрале околу 157 милијарди долари – што е зголемување од 70 отсто во однос на минатата година.

Компанијата на Маск, „Екс еј-ај“, интензивно бара капитал. Според „Блумберг“, фирмата, која веќе собрала околу 10 милијарди долари преку корпоративен капитал и заемни инструменти во текот на годинава, сè уште има потреба од милијарди дополнителни средства, имајќи предвид дека троши приближно 1 милијарда долари месечно. Маск исто така ги вклучил и другите свои компании, меѓу кои „Спејс екс“ (SpaceX), како инвеститори во „Екс еј-ај“. Во текот на годинава акционерите на „Тесла“ (Tesla Inc.) ќе гласаат дали производителот на електрични автомобили треба да инвестира во „Екс еј-ај“.

Маск досега повеќепати нагласуваше дека вештачката интелигенција ќе биде темел на многу од неговите футуристички производи – од автомобили со самостојно управување до целосно автономни роботи.