„Спејс екс“ на Илон Маск проценет на 400 милијарди долари

„Спејс екс“ (SpaceX) разговара за планови за собирање пари и продажба на акции од инсајдери во договор што би ја проценил компанијата на Илон Маск, којашто произведува ракети и сателити на околу 400 милијарди долари, велат луѓе запознаени со ова прашање.

Тоа би претставувало најголема проценка досега за приватна американска компанија, надминувајќи го претходниот рекорд на „Спејс екс“ од 350 милијарди долари од откупот на акции во декември и конкурирајќи со вредностите на сопственикот на ТикТок – „Бајтденс“ (ByteDance) и на „Опен еј-ај“ (OpenAI).

Претставник на „Спејс екс“, формално познат како „Спејс Експлорејшн Технолоџис Корп.“ (Space Exploration Technologies Corp.), не одговори веднаш на барањето за коментар.

Проценката одразува низа фактори, вклучувајќи го и порастот на нејзината брзорастечка единица за сателитски интернет Старлинк (Starlink), за која луѓе запознаени со ова прашање велат дека сочинува повеќе од половина од годишните приходи на компанијата, како и способноста на „Спејс екс“ да постигне нови пресвртници со својата ракетна програма „Старшип“ (Starship).

„Спејс екс“, веќе меѓу водечките добавувачи на ракетни лансирања во индустријата, работи на враќање на развојот на револуционерниот систем за лансирање по низа експлозивни неуспеси, вклучително и огромна експлозија на неговиот тест штанд во Тексас во јуни.

Маск, најбогатиот човек во светот, повторно е заглавен во јавна расправија со американскиот претседател Доналд Трамп околу значајниот пакет за намалување на трошоците и даноците на претседателот, и ја најави идејата за лансирање нова политичка партија. Најновата расправија дополнително го еродира некогашниот сојуз меѓу Маск и Белата куќа, кој сигнализираше неочекувани можности низ деловната империја на милијардерот.

Стратегијата на „Спејс екс“ вклучува лансирање на примарна рунда за собирање средства за време на која ќе продаде мал број нови акции на инвеститорите, рекоа некои од луѓето, кои побараа да не бидат идентификувани. Една од рундите за собирање средства на „Спејс екс“во 2021 година, донесе околу 850 милиони долари.

Потоа, истовремено, „Спејс екс“ ќе продава акции на вработени и рани инвеститори во секундарна понуда, при што цената ќе се определи од примарната рунда.

Деталите би можеле да се променат во зависност од интересот на инсајдерските продавачи и купувачи, како што се случи за време на претходните откупи на компанијата, велат изворите.