Илон Маск се заканува со политичка одмазда поради даночниот закон на Трамп

Илон Маск повторно се закани дека ќе го зголеми своето трошење за политички цели, овој пат насочувајќи се речиси кон секој актуелен републиканец во Конгресот што изразил поддршка за мултитрилионскиот даночен закон на претседателот Доналд Трамп.

„Секој член на Конгресот што водеше кампања за намалување на владините трошоци, а потоа веднаш гласаше за најголемото зголемување на долгот во историјата, треба да се срами!“, објави Маск на својата социјална мрежа X. „И тие сигурно ќе ги загубат прелиминарните избори следната година, па макар тоа да е и последното нешто што ќе го направам на оваа земја“.

Маск, извршен директор на „Тесла“ (Tesla Inc.) и на „Спејс екс“ (SpaceX), претходно за „Блумберг њуз“ (Bloomberg News) изјави дека планира значително да го намали своето политичко трошење откако потроши четвртина милијарда долари во изборниот циклус во 2024 година, главно поддржувајќи го Трамп. „Мислам дека направив доволно“, рече тој во мај кога беше прашан за тоа.

 

 

Но, претходно месецов, веднаш по напуштањето на својата формална владина улога како советник на Трамп, милијардерот жестоко го нападна даночниот и буџетскиот пристап на претседателот, во серија објави што предизвикаа онлајн расправија и експлозивен јавен конфликт меѓу двајцата.

За време на викендот Маск предупреди дека предложените кратења на субвенциите за електрични возила и други технологии на чиста енергија би биле „неверојатно деструктивни“ за земјата, уништувајќи милиони работни места во САД и давајќи им „подароци на индустриите од минатото, додека сериозно ги оштетуваат индустриите на иднината“.

Критиките повторно ја разгореа јавната тензија меѓу Маск и Трамп, која во последните недели изгледаше како да се смирува.

„Не сум разговарал многу со него, но мислам дека Илон е прекрасен човек и знам дека секогаш ќе му оди добро“, изјави Трамп во емисијата СМФ (Sunday Morning Futures) на „Фокс њуз“ (Fox News) со Марија Бартиромо, која се емитуваше во неделата, но беше снимана во петокот, пред најновите објави на милијардерот. „Но малку се налути и, знаете, тоа не беше соодветно“.

Во моментов нема коментари за веста. Биди прв да коментира...

Остави коментар