Трамп го опомена Илон Маск со пат назад кон Јужна Африка

Доналд Трамп повторно се закани дека ќе ги повлече државните субвенции за компаниите на Илон Маск, откако извршниот директор на „Тесла“ (Tesla Inc.) ја засили својата критика кон даночната и буџетската политика на претседателот.

Трамп на Трут сошл напиша дека Маск „можеби добива повеќе субвенции од кој било човек во историјата, убедливо“ и дека, без државна поддршка, „Илон веројатно би морал да го затвори бизнисот и да се врати дома во Јужна Африка“.

Претседателот посочи дека Одделот за владина ефикасност (Department of Government Efficiency – DOGE), кој Маск го предложи за време на кампањата на Трамп и го водеше неколку месеци, сега може да се сврти против лидерот на „Тесла“ и „Спејс екс“ (SpaceX). Тој напиша дека DOGE може детално да го испита финансирањето на САД за ракетни лансирања, сателити и производство на електрични возила. ГОЛЕМИ ПАРИ ШТО МОЖЕ ДА СЕ ЗАШТЕДАТ!, напиша Трамп.

Трамп повторно се обидува да ги одбие нападите од најголемиот финансиер на неговата успешна претседателска кампања, речиси еден месец по нивната расправија за истите прашања. Маск објави десетици пати откако републиканците во Сенатот во саботата претставија нова верзија на нивниот даночен пакет, кој го забрзува укинувањето на популарниот даночен кредит од 7.500 долари за купување електрични возила.

„Ако овој луд буџетски закон помине, следниот ден ќе се формира партијата Америка“, наведе Маск на X, повторувајќи го својот повик за создавање нова политичка партија во САД. Тој негираше дека неговото противење е заради зачувување на субвенциите за неговите компании, пишувајќи во друга објава: „Буквално велам СЀ ДА СЕ СЕЧЕ. Сега“.

Акциите на „Тесла“ паднаа до 5,7 отсто  во раното тргување во вторникот и беа во минус од 4,9 отсто до 5:15 часот наутро во Њујорк. Акциите паднаа за 14 отсто на 5 јуни, кога Маск и Трамп првпат се судрија околу буџетскиот закон.

Покрај тоа што продава повеќе електрични возила со поттик за потрошувачи од која било друга компанија, „Тесла“ и нејзиниот партнер за батерии „Панасоник“ (Panasonic Holdings Corp.) се најдобро позиционирани да добијат производствени даночни кредити вклучени во климатскиот закон на поранешниот претседател Џо Бајден.

„Тесла“ исто така продава кредити на други производители на автомобили што имаат потреба од помош за да ги исполнат барањата за возила со нулта емисија во Калифорнија и стандардите за емисии во САД. Аналитичарите на „ЏП Морган“ (JPMorgan Chase & Co.) на почетокот на годинава проценија дека променливата регулаторна средина под водство на Трамп може да загрози околу 40 отсто од профитот на „Тесла“.

„Илон Маск знаеше, многу пред силно да ме поддржи за претседател, дека јас силно се спротивставувам на легислативата за електрични возила“, нагласи Трамп во својата објава на Трут сошл. „Тоа е апсурдно и отсекогаш беше главен дел од мојата кампања. Електричните автомобили се во ред, но не треба секој да биде принуден да поседува такво возило“.

„Тесла“ неделава треба да ги објави податоците за испораките во вториот квартал, кои најверојатно ќе покажат дополнителен пад на побарувачката. Аналитичарите во просек проценуваат дека компанијата продала околу 390.600 возила на глобално ниво – што е пад од околу 12 отсто во споредба со минатата година, по падот од 13 отсто  во првиот квартал.