Акцијата на „Тесла“ е на пресвртна точка, велат аналитичарите

Додека „Тесла“ (Tesla Inc.) се подготвува да објави резултати за кои многумина очекуваат дека ќе го одредат тонот за амбициите на компанијата околу вештачката интелигенција, аналитичарите ги „чешлаат“ графиконите за индиции за тоа каде се движи акцијата.

Откако достигна рекордно високо ниво во декември, акцијата на „Тесла“ изгуби сила, губејќи повеќе од 16 отсто досега оваа година, додека инвеститорите чекаат новости за нејзините производи за автономија и роботика. Во тој период, таа ја издржа првичната јавна понуда на „Спејс екс“ (Space Exploration Technologies Corp.) на Илон Маск,  за која многумина очекуваа дополнително да го намали апетитот на инвеститорите за производителот на електрични возила.

Stefani Reynolds/Bloomberg

 

„Акциите на ‘Тесла’ се на важна пресвртна точка“, вели Крег Џонсон, главен пазарен техничар во „Пајпер Сeндлер“ (Piper Sandler), истакнувајќи го трендот на пораст што датира од најниското ниво на акциите во 2024 година. Тоа ниво, кое моментално е околу 370 долари, оттогаш дејствува како линија на поддршка за акциите на „Тесла“. Паѓањето под него би можело да наговести понатамошни падови во иднина.

Раководителот на одделот за техничка анализа на „Евркор“ (Evercore ISI), Рич Рос, ја нарече состојбата на акциите оваа година „речиси анти-моментум“. Ќе треба да се искачи над 450 долари за да се отвори вратата кон приближување кон рекордниот максимум од 489,88 долари што го достигна на крајот од минатата година, рече Рос.

Иако е тешко да се предвиди во која насока ќе се движи акција како „Тесла“, водена од расположение и моментум, техничката анализа и позиционирањето укажуваат на „мечкин став“. 

 

Bloomberg Mercury

 

Акциите остануваат под краткорочните и долгорочните опсези на тргување - 50-дневниот подвижен просек од 408 долари и 200-дневниот просек од 416 долари - нивоа што трговците внимателно ги следат за да го проценат моментумот на хартијата од вредност. Друг индикатор, конвергенцијата/дивергенцијата на подвижниот просек на акциите (MACD), исто така трепка црвено.

Покрај тоа, трговците што се обложуваат против акциите ги зголемија своите позиции во „Тесла“ во текот на изминатите четири месеци, според Метју Антерман од „С3 Партнерс“ (S3 Partners). Моментално, оние со кратки позиции држат 3 отсто од акциите на Тесла, во споредба со 2,5 отсто пред една година, покажуваат податоците на фирмата. 

„Тесла влегува во моментот на објава на заработките со мечкино позиционирање и ослабување на техничките показатели, зајакнувајќи го истиот наратив“, напиша Антерман во белешка на 21 јули. „Товарот на докажување е на биковите.“

Трговците со опции, исто така, се чини дека се ладат во однос на Тесла, при што вкупните позиции паѓаат за околу 40 отсто од крајот на декември.

Додека позициите се намалуваат, трошоците за заштита од осцилации на акциите се зголемуваат, при што едномесечните опции оваа недела се приближуваат кон највисоките нивоа оваа година. Опциите веројатно се ценат повисоко за барем делумно да следат остар скок во реализираните осцилации на цените.

Се очекува компанијата да пријави 0,51 долари во прилагодена заработка по акција со 26,3 милијарди долари приходи во среда. Тесла забележа голем скок на кварталната продажба на автомобили претходно овој месец. Но, инвеститорите навистина бараат опипливи информации за роботаксито, роботите и другите производи поврзани со вештачка интелигенција на кои „Тесла“ го закачи својот иден раст.

Исто така, позначаен раст на акцијата е спречен од вртоглаво високото вреднување на „Тесла“.  Акциите се тргуваат со 167 пати по заработката, што ја прави втората најскапа акција во S&P 500. „Епл“, со коефициент од 34, го има следниот највисок сооднос цена-заработка во групата „Седум величествени“.