Маск веќе не е најбогат на светот, Лари Елисон седна на тронот

Лари Елисон за првпат стана најбогатиот човек на светот, со што заврши речиси едногодишното владеење на Илон Маск.

Богатството на Елисон порасна за 101 милијарда долари, откако „Оракл“ (Oracle Corp) ги објави кварталните резултати кои ги надминаа очекувањата и соопшти дека следи понатамошен раст.

Зголемувањето го подигна неговото вкупно богатство на 393 милијарди долари, пред Маск кој бележи 385 милијарди долари, според индексот на билионери на Блумберг. Тоа е најголемиот дневен раст што индексот некогаш го забележал.

Маск за првпат стана најбогатиот човек на светот во 2021 година, но титулата му ја одземаа основачот на „Амазон“, Џеф Безос, и шефот на ЛВМХ, Бернар Арно. Ја врати минатата година и ја држеше нешто повеќе од 300 дена.

Елисон, кој има 81 година, е коосновач на „Оракл“ и денес е претседател и главен технолошки директор на таа компанија, а најголемиот дел од неговото богатство е поврзано токму со производителот на софтвер за бази на податоци.

Акциите на „Оракл“, кои до затворањето на берзата во вторникот веќе пораснаа за 45 проценти од почетокот на годината, во средата скокнаа за 41 процент откако компанијата објави значаен раст на резервациите и даде агресивни прогнози за својот бизнис со инфраструктура во облак. Тоа е најголемиот еднодневен скок на акциите на „Оракл“ во историјата.

Од друга страна, акциите на компанијата на Маск, „Тесла“, паднаа за 13 проценти оваа година. Управата на компанијата предложи импресивен пакет исплата за Маск, кој, ако успее да исполни низа амбициозни цели, би можел да стане првиот светски билионер.

 

Во моментов нема коментари за веста. Биди прв да коментира...

Остави коментар