Владетелите на силициумот го преземаат тронот, а еден само што ги надмина легендите

Додека некои од водечките традиционални инвеститори годинава бележат пад на своето нето-богатство, Џенсен Хуанг, коосновач и извршен директор на производителот на чипови „Енвидија“, зема залет во спротивна насока – со подем, кој на одреден начин ја симболизира надмоќта на технолошките иновации над конзервативните стратегии за инвестирање и збогатување.

Листата на милијардери на „Блумберг“ покажува дека Хуанг според личното богатство неодамна го надминал францускиот бизнис-магнат и раководител на најголемиот светски производител на луксузна стока ЛВМХ, Бернард Арно, како и легендарниот инвеститор Ворен Бафет, и се искачил на осмото место. Шефот на „Енвидија“, моментално највредната светска компанија, располага со богатство од дури 157 милијарди долари. Арно е деветти на листата со 153 милијарди, а Бафет е на десеттото место со 140 милијарди долари.

Според последната евидентирана промена на листата, Хуанг го зголемил своето богатство за околу 1,27 милијарда долари, додека од почетокот на годината досега растот на неговото богатство изнесува импресивни 43 милијарди долари.

Jensen Huang / Bloomberg

Овие поместувања го следат силниот раст на „Енвидија“, како еден од водечките играчи во областа на чиповите и вештачката интелигенција (ВИ).

Да потсетиме, американската технолошка компанија, со седиште во Санта Клара (Калифорнија), неодамна повторно започна да ѝ продава чипови H20 на Кина, со зелено светло од Вашингтон. Тоа дополнително зборува за нејзиното значење на пазарот, имајќи ги предвид добро познатите затегнати економски и геополитички односи меѓу двете најголеми светски економии.

Соборувањето на рекордот на „Енвидија“, искачувањето на Хуанг на листата на најбогатите во светот и фактот што поголемиот дел водечки имиња на самата листа на „Блумберг“ доаѓаат од светот на технологијата укажуваат на тоа дека индустријата на иновации – со акцент на вештачката интелигенција – продолжува да ги диктира насоките на раст, додека традиционалните сектори на луксуз и инвестиции деновиве заостануваат.

Иако, според најновите промени, сопственикот на конгломератот ЛВМХ забележал раст од 1,13 милијарда долари, неговото богатство во 2025 година опаднало за 23,6 милијарди долари, што главно е последица на флуктуациите на пазарот на луксузни добра и промените во вредноста на имотот на самата група. Слабата побарувачка, американските царини и проблемите во „Диор“ го доведоа ЛВМХ во најтешкиот период во историјата на компанијата.

Bernard Arnault / Nathan Laine/Bloomberg

Имаше доста турбуленции и во деловниот живот на Бафет, една од највлијателните фигури во светот на инвестирањето. „Беркшир Хатавеј“, компанијата што ја основал пред многу децении, неодамна, првпат по три години, почна да ги намалува готовинските резерви. Бафет, според последното мерење, забележал пад на нето-богатството од 1,54 милијарда долари, како и пад од 2,52 милијарди долари од почетокот на 2025 година досега. Оваа промена може да се поврзе и со намалувањето на вредноста на акциите на „Беркшир Хатавеј“.

Warren Buffett / Bloomberg

Зошто „Енвидија“ е толку успешна?

„Енвидија“ е на врвот благодарение на комбинацијата од продорна ВИ-технологија, иновативни производи и цврста финансиска основа, поткрепена со клучни партнерства. И покрај регулаторните ризици и пазарните потреси, продолжувањето со издавање нова архитектура како „Блеквел“ и „Рубин“ (планирана за 2026 година) ѝ дава силен поттик. Во наредниот период очите на инвеститорите же бидат вперени и во кварталниот извештај за заработката на „Енвидија“, кој ќе биде објавен на 27 август.

Еве неколку клучни причини поради кои „Енвидија“ е лидер на пазарот на ВИ-чипови и највредна светска компанија:

Експлозија на побарувачката за чипови

„Енвидија“ профитираше од огромната побарувачка за ВИ-компатибилни чипови, што доведе до растечка продажба на нејзините производи, но и до повисоки цени и рекордни маржи – бруто-маржата достигна околу 75 отсто на почетокот на 2025 година. Во последните пет години приходите се зголемија десеткратно, а вкупниот принос за акционерите скокна над 1.800 отсто, пренесе „Ројтерс“ тогаш. Четвртина од приходите на „Енвидија“ доаѓаат од дата-центри.

Иновативна архитектура и технолошки екосистем

Во прв план е „Блеквел“, иновативна GPU архитектура за генеративна вештачка интелигенција, со користење врвна меморија HBM3e, стандард PCIe 6.0 и спарување со процесорот „Грејс“ на „Енвидија“. Во потрошувачкиот сегмент, серијата GeForce RTX 50 носи меморија GDDR7 и DLSS 4 со мултифрејм-генерација, а во 2026 година следува и најавеното лансирање на „Рубин“ – архитектура GPU+CPU заснована на 3nm процес и меморија HBM4. „Енвидија“ располага со интегрирана софтверска рамка (CUDA, NIM, Morpheus, AI Workbench), што ѝ обезбедува огромна конкурентска предност.

Финансиска сила и стабилност

Компанијата се потпира на многу ниска задолженост и има силно генерирање на слободен паричен тек, со стабилен раст на приходите. На пример, пазарната вредност на „Енвидија“ е поголема од бруто-домашниот производ (БДП) речиси на сите земји во светот, со исклучок на пет – САД, Кина, Германија, Индија и Јапонија. Тоа доволно зборува за нејзината големина.

Влијание врз пазарот

„Енвидија“ е првата компанија со пазарна капитализација од над четири билиони долари, со што ги надмина гигантите како „Епл“ и „Мајкрософт“. Нејзиното работење значително влијае врз индексот S&P 500, бидејќи во еден момент „Енвидија“ сочинувала повеќе од една петтина од вкупниот принос на индексот. Сепак, аналитичарите предупредуваат на потенцијалните ризици од прекумерната зависност на пазарот од ВИ -инвестиции, што би можело да предизвика корекции доколку растот забави.

 

Од каде потекнува богатството на водечките пет милијардери?

Индексот на милијардери на „Блумберг“ јасно покажува дека технолошкиот сектор и понатаму е главниот генератор на огромно лично богатство. Сепак, дури и во светот на толку големи богаташи, поединечни настани, како пазарни падови, промени во корпоративното управување или големи донации, можат драстично да влијаат врз позициите на листата.

На првото место на актуелната листа на милијардери на „Блумберг“ е Илон Маск (366 милијарди долари), чиј главен извор на богатство потекнува од компаниите што самиот ги основал – „Тесла“, „Спејс екс“, xAI, „Неуралинк“, „Боринг компани“ и X (поранешен „Твитер“). „Спејс екс“ и „Тесла“ се извор на најголемиот дел од финансиската моќ на Маск: во „Тесла“, вредна 124 милијарди долари, Маск има удел од околу 13 отсто, додека неговиот удел во „Спејс екс“ изнесува 42 отсто, а компанијата е проценета на 136 милијарди долари.

Elon Musk / Bloomberg

Лари Елисон, со лично нето богатство од 301 милијарда долари, се наоѓа на почесното второ место. Најголемиот дел од своето богатство Елисон го црпи од „Оракл“, каде што поседува меѓу 40 и 42 отсто сопственост. „Оракл“ во моментов е во голема експанзија, особено поради вештачката интелигенција. Компанијата го зголеми вложувањето во нови технологии, издвојувајќи дури 30 отсто од буџетот за истражување и развој, го лансира проектот „Старгејт“ од 500 милијарди долари за ВИ-инфраструктура, а тука е и аквизицијата на „Дата сајанс“ (DataScience.com). Елисон исто така го диверзифицирал своето богатство со вложувања во „Оксфорд нанопор“ (Oxford Nanopore) и други биотехнолошки компании.

Марк Закерберг целосно зависи од „Мета платформс“, компанијата што стои зад Фејсбук и Инстаграм. Во неговото портфолио нема значајни диверзификации како кај Елисон, а најголемиот дел од богатството е поврзан со успехот на платформите на „Мета“. Закерберг во моментов располага со 267 милијарди долари, што го позиционира на третото место на листата на милијардери на „Блумберг“.

На четвртото место е Џеф Безос, со нето-богатство од 245 милијарди долари. Главниот извор на богатството на Безос е „Амазон“, со дополнителни проекти како „Блу ориџин“, кои придонесуваат за неговото глобално влијание.

Стив Балмер располага со 178 милијарди долари и го зазема петтото место на листата, а најголемиот дел од своето богатство го должи на „Мајкрософт“, каде што поседува значителен удел во облик на акции – поголем од 80 отсто од неговото портфолио. Треба да се спомнат и неговите помали вложувања во индексни фондови. Иако има и други интереси, како „Балмер груп“ и сопствеништвото на клубот ЛА Клиперс, неговата инвестициска филозофија е „нека биде едноставно“ (англ. Keep It Simple) – со други зборови, верува во лојалност кон компанијата, а не толку во диверзификација.

Во моментов нема коментари за веста. Биди прв да коментира...

Остави коментар