„Староста ме стигна“ – Ворен Бафет отворено за повлекувањето од бизнисот

Не почнав да стареам, по некоја чудна причина, сè до деведесеттата, изјави Ворен Бафет во интервју за „Волстрит журнал“ (The Wall Street Journal), најавувајќи го своето повлекување од позицијата главен извршен директор на „Беркшир Хатавеј“ (Berkshire Hathaway). На 94 години, легендата на американскиот бизнис реши да му ја препушти функцијата на Грег Ејбел, човекот што со години важи за негов најлогичен наследник.

Бафет откри дека нема конкретен момент кога ја донел одлуката, туку дека таа дошла природно, како дел од процесот на стареење. „Како знаеш кога точно стануваш стар?“, прашува реторички, додавајќи дека одеднаш почнал да чувствува промени – нарушена рамнотежа, проблеми со помнење имиња, па дури и печатот во весниците почнал да му изгледа избледено.

Во последните неколку години разликата во енергијата и темпото меѓу него и Ејбел станала сè поочигледна. „Разликата во тоа колку можевме да постигнеме за десет часа беше драматична“, рече Бафет. „Тој беше многу поефикасен, подобар во менаџирањето, подобар во интервенциите таму каде што беа потребни промени. Неправедно беше да не му ја препуштам функцијата“.

Грег Ејбел (62) е дел од „Беркшир“ од 1999 година, кога компанијата инвестираше во „Мидамерикан енерџи“ (MidAmerican Energy). Импресиониран од неговата работа во енергетскиот сектор, Бафет го назначи за потпретседател во 2018 година и му довери надзор над сите неосигурителни бизниси. Во 2021 година јавно го именува како свој иден наследник, но ретко кој очекуваше транзицијата да се случи толку брзо.

На годишниот состанок на „Беркшир“ на 3 мај, Бафет ја соопшти одлуката пред преполната сала во Омаха. Настана тишина – дури и Ејбел не знаел дека најавата доаѓа – пред да избувне аплауз од публиката. Бафет потврди дека ќе се повлече од функцијата извршен директор во декември, но ќе остане претседател на бордот на директори, без одреден рок за тоа колку долго ќе ја задржи таа улога.

„Сè уште се чувствувам добро. Одам секој ден во канцеларија и работам со луѓе што ги сакам и што ме сакаат“, рече Бафет. Иако признава дека возраста влијаела на некои негови способности, тој вели дека не изгубил една од најважните – способноста да носи храбри и рационални инвестициски одлуки во време на пазарни турбуленции.

„Јас не се плашам кога цените паѓаат. Тоа не зависи од возраста“, истакнува Бафет, додавајќи дека и Ејбел го има тој инвестициски инстинкт.

Новата ера за „Беркшир Хатавеј“ започнува за помалку од осум месеци. Но Бафет нема намера да се повлече целосно: „Нема да седам дома и да гледам сапуници“, се пошегува. „Моите интереси сѐ уште се исти“.