Формулата на Ворен Бафет покажува дека е време за купување на акции

Клучен показател за вреднување фаворизиран од легендарниот инвеститор Ворен Бафет сигнализира дека акциите се релативно евтини, зајакнувајќи го аргументот дека жешкото закрепнување на американските акции има простор да продолжи.

„Индикаторот на Бафет“ ја мери стапката на вкупната вредност на американскиот пазар на акции преку Wilshire 5000 индексот поделена со вредноста на американскиот бруто домашен производ (БДП). Тој се наоѓа на најниско ниво од почетокот на септември – дури и по растот кој во последните неколку недели ги лансира акциите нагоре со голема брзина.

94-годишниот извршен директор на „Беркшир Хатавеј“ (Berkshire Hathaway), кој викендов ќе го одржи своето годишно собрание во Омаха, Небраска, има изјавено дека „најдобрата единечна мерка за тоа каде се наоѓаат вреднувањата“ е односот меѓу вредноста на американските јавно тргувани компании и БДП-то на земјата. Индикаторот испрати предупредување кон крајот на минатата година кога достигна историски максимум, слично како што беше и за време на пазарните врвови во 2021 и пред пукањето на „дот-ком“ (.com) балонот во 2000 година.

Мерката сега изнесува 180 отсто, каде што беше отприлика по завршувањето на „carry trade“ со јапонскиот јен, што предизвика кратка но интензивна распродажба минатата година. Тој пазарен пад го расчисти патот за силно закрепнување на индексот S&P 500 во последните месеци од 2024 година.

„Ова е клучен индикатор бидејќи им помага на трговците да знаат кога да вложат капитал и да купуваат акции“, рече Адам Сархан, основач на „50 Парк инвестментс“ (50 Park Investments), кој активно купува акции на големите технолошки компании. „Постои причина за загриженост околу глобалната трговска војна, но ако Трамп не форсира со царините, луѓето ќе купуваат, купуваат, купуваат бидејќи вреднувањата сега се многу пореално поставени.“

Вредносните показатели од секаков вид добија дополнително значење оваа година, бидејќи инвеститорите се обидуваат да утврдат дали продажбата предизвикана од царините ги направи акциите поевтини во однос на нивните основни вредности. Тие пресметки се комплицирани поради порастот од 12 отсто на S&P 500 од априлските најниски точки, што ги тера трговците да се запрашаат дали да се обложат на инерцијата која би го одвела индексот уште повисоко – или да се засилат заштитните стратегии и да се обложат на нов пад. Индексот сè уште е речиси 9 отсто под рекордот од февруари.

Покрај непредвидливите пресврти во трговската војна на претседателот Доналд Трамп, инвеститорите ја следат и сезоната на објавување на квартални резултати и се подготвуваат за состанокот на Федералните резерви (Фед) следната седмица, како потенцијални катализатори кои можат да ја одредат насоката на пазарот на акции.

Што се однесува до индикаторот, тој сè уште е над нивоата што ги достигна за време на претходните пазарни падови, вклучувајќи ја и продажбата поврзана со ковид-19 од почетокот на 2020 година, кога падна речиси за 100 отсто. 

Критичарите на индикаторот на Бафет тврдат дека, меѓу другото, оваа мерка може да ги игнорира ефектите од зголемените каматни стапки. Поголемите трошоци за задолжување можат да ја намалат добивката на компаниите и да влијаат негативно врз цените на акциите. Некои стратези исто така сметаат дека вреднувањето е лоша алатка за одредување на времето за пазарни движења, бидејќи средствата можат да останат евтини или скапи долго време пред да дојде до корекција.

Сепак, малкумина инвеститори би го игнорирале показателот што го фали Бафет, кој е познат по тоа што купува евтини акции. Трговците со нетрпение го очекуваат годишниот состанок на „Беркшир“ в сабота, делумно за да дознаат дали Бафет има „навлезено“ во готовинскиот фонд на компанијата — кој последен пат беше на рекордни 321 милијарда долари — за да ја искористи шансата за поволни зделки на пазарот.

Ова можеби ќе биде едно од последните собранија за Бафет, кој во годишното писмо упатено до акционерите претходно годинава посочи дека „нема да мине многу време“ пред наследник да ја преземе функцијата на главен извршен директор, а најверојатно тоа ќе биде Грег Ајбел од „Беркшир“.

Во моментов нема коментари за веста. Биди прв да коментира...

Остави коментар