Акционерите на „Тесла“ го одобрија пакетот од 1 билион долари за Маск

Акционерите на „Тесла“ (Tesla Inc.) го одобрија пакетот од 1 билион долари за Илон Маск – најголемата награда досега доделена на корпоративен лидер.

Повеќе од 75 отсто од дадените гласови биле во прилог на овој невиден план за компензација, соопшти компанијата во четвртокот на годишното собрание. Исходот го заокружува неколкунеделниот ангажман на Управниот одбор, извршниот директор и познати мали инвеститори на производителот на електрични возила.

Договорот за компензација му го отвора патот на Маск – најбогатиот човек во светот – да стане првиот билионер и да го зголеми својот удел во „Тесла“ на најмалку 25 отсто во следната деценија. За да ја добие целата сума, тој ќе мора да исполни цели што вклучуваат значително зголемување на пазарната вредност на „Тесла“, заживување на нејзиниот ослабен бизнис со автомобили и развој на проектите за роботакси и роботите „Оптимус“.

„Ова не е само ново поглавје за ‘Тесла’ туку целосно нова книга“, изјави Маск на состанокот со акционерите, облечен во црна јакна со логото на „Тесла“, додека се движеше по сцената пред насобраната публика што го поздравуваше со аплауз. „А таа нова книга значи огромно зголемување на производството на возила и забрзување на производството на ‘Оптимус’ побрзо од сè што некогаш било постигнато во човечката историја.“

Гласањето за компензацијата беше клучно за „Тесла“, откако Маск порача дека би можел да се повлече или да посвети повеќе време на своите други компании доколку не добие поголема контрола врз производителот на автомобили. Сега, најверојатно ќе остане на чело на „Тесла“, додека компанијата ја реализира својата амбициозна агенда заснована на автономни возила и вештачка интелигенција.

Целите на „Тесла“ за Маск
Извршниот директор мора да постигне и пазарна вредност и оперативна цел за секој дел од акциите во рамките на наградата.

Bloomberg

Акциите на „Тесла“ пораснаа за помалку од 1 отсто до 19:16 часот, по завршувањето на редовното тргување во четвртокот во Њујорк, по претходниот раст од 3,4 отсто. Акцијата бележи зголемување од 10 отсто од почетокот на годината до затворањето во четвртокот, нешто помалку од растот од 14 отсто на индексот S&P 500.

Маск најави неколку амбициозни цели додека компанијата се движи кон 2026 година и понатаму.

Извршниот директор, кој ја предводи компанијата за електрични возила од 2008 година, изјави дека „Тесла“ би можела да изгради сопствена фабрика за чипови за да го постигне потребното производство, иако моментално соработува со веќе етаблирани доставувачи како „Самсунг“ (Samsung) и ТСМЦ (TSMC).

„Дури и ако го земеме предвид најдоброто можно сценарио за производството на чипови од нашите доставувачи, тоа сè уште не е доволно“, рече Маск. „Затоа мислам дека можеби ќе треба да направиме ‘Тесла терафаб’ – тоа е како гигафабрика, само многу поголема.“

Тој додаде дека следната година фокусот ќе биде на проектите „Оптимус“, „Семи“ и „Сајберкаб“. Маск очекува производството на „Сајберкаб“ да се совпадне со добивањето регулаторно одобрение. 

Тој истакна и дека „Тесла“ има амбициозна цел да го зголеми обемот на производство на возила за околу 50 отсто до крајот на следната година.

Интензивна кампања

Очекувано, акционерите го поддржаа платниот пакет, и покрај противењето на неколку големи инвеститори, меѓу кои и норвешкиот фонд „Норџес банк инвестмент“ (Norges Bank Investment Management), деветтиот најголем акционер во „Тесла“. Консултантските фирми ИСС (Institutional Shareholder Services) и „Глас Луис“ (Glass Lewis), кои советуваат инвеститори како да гласаат на собранија на компании, препорачаа да не се поддржува планот за компензација, предупредувајќи дека е преголем и може да го намали уделот на другтите акционери.

Управниот одбор водеше агресивна кампања за обезбедување поддршка, која вклучуваше состаноци со големи институционални акционери и низа медиумски настапи на претседателката Робин Денхолм. Во интервјуа за „Блумберг њуз“, Денхолм го претстави гласањето како клучно за иднината на „Тесла“, нагласувајќи дека компанијата има потреба од Маск за да ги постигне своите цели.

Маск лично се обиде да ја зајакне поддршката, користејќи дел од последниот повик со инвеститорите по објавата на кварталните резултати на „Тесла“ за да објасни зошто не се чувствува удобно да гради „роботска армија“ доколку не поседува најмалку четвртина од компанијата.

Неделава „Шваб“ (Schwab Asset Management) вети дека ќе го поддржи предлогот за пакетот, откако голем број познати мали инвеститори на социјалните мрежи порачаа дека ќе ги повлечат своите средства од брокерските компании што гласале против. Неколку други институционални инвеститори, меѓу кои и Одборот за државна администрација на Флорида, исто така најавија дека ќе гласаат „за“ пакетот.

„Дури и со новиот платен пакет, остануваат значителни пречки за неговото реализирање – вклучувајќи профитабилно проширување на операциите на ‘Тесла’ и испорака на голем број роботи и роботаксија“, изјави аналитичарот на „Ведбуш секјуритис“ (Wedbush Securities) Ден Ајвс, долгогодишен поддржувач на „Тесла“. „Сега целта е да се напише најважното поглавје во историјата на ‘Тесла’, со фокус кон ерата на самоуправувачките возила.“

Победата му отвора на Маск јасен, иако предизвикувачки пат кон тоа да стане првиот билионер во светот. Ако ги исполни сите цели во планот, меѓу кои е и зголемувањето на пазарната вредност на „Тесла“ на 8,5 билиони долари, неговиот вкупен удел во производителот на автомобили би достигнал околу 2,4 билиони долари.

Тоа е над петпати повеќе од неговото тековно нето-богатство, проценето на околу 460 милијарди долари, според индексот на милијардери на „Блумберг“ (Bloomberg Billionaires Index). Неговото богатство би го надминало бруто-домашниот производ на сите земји во светот, освен седум.

Богатство со многу подеми и падови

Богатството на Маск оваа година доживува вистинско возење на ролеркостер. Во јануари изнесуваше околу 450 милијарди долари, кога тој му се придружи на претседателот Доналд Трамп на неговата инаугурација, но потоа почна нагло да опаѓа, бидејќи политичките ставови на извршниот директор – вклучувајќи ја и неговата истакната улога во новоформираното Министерство за владина ефикасност – одвратија многу потенцијални купувачи на „Тесла“.

Кавгата меѓу двајцата доведе до драстичен пад на акциите на „Тесла“, што резултираше со вториот најголем еднодневен пад на богатството што е забележан некогаш во индексот на милијардери на „Блумберг“.

Bloomberg

Богатството на Маск оттогаш повторно порасна, потпомогнато од закрепнувањето на акциите на „Тесла“ и растечките процени на вредноста на неговите приватни компании, меѓу кои „Екс еј-ај“ (xAI) и „Спејс екс“ (SpaceX).

Новиот пакет предизвика критики од некои негови долгогодишни противници, меѓу кои и државниот ревизор на Њујорк, Томас Динаполи, кој во четвртокот изјави дека ова е „плата за неограничена моќ, а не за резултати“. Сенаторот од Вермонт, Берни Сандерс, го нарече планот „целосно апсурден“.

„Луѓето не можат да си дозволат кирија, здравствена заштита, храна, ниту достоинствено пензионирање“, изјави Сандерс. „А ние зборуваме за човек што веќе поседува повеќе богатство од 52 отсто од американските домаќинства – и сега ќе стане уште побогат.“

Пакетот следува по претходниот повеќебилионски план за компензација на Маск, кој минатата година беше поништен од суд во Делавер. Компанијата ја обжали одлуката и го префрли своето правно седиште во Тексас, делумно како реакција на тој случај. Во август одборот на „Тесла“ му одобри и привремена награда вредна 30 милијарди долари, со цел делумно да го надомести поништениот пакет.

Во четвртокот „Тесла“ соопшти дека ѝ е потребно дополнително време за преглед на гласовите за необврзувачкиот предлог на акционерите, компанијата да инвестира во „Екс еј-ај“– стартапот за вештачка интелигенција на Маск. Според поднесените гласови, повеќето биле во прилог на предлогот, но бројот на воздржани бил толку висок што, според „Тесла“, прашањето бара понатамошна дискусија.

Предлогот, кој повикува на инвестиција „во износ и форма што ќе ги утврди управниот одбор“, е советодавен, што значи дека „Тесла“ нема обврска да го спроведе. Маск јавно ја поддржа идејата и минатата година предложи вложување од 5 милијарди долари.