Вирално видео ја разниша довербата во „Поп Март“, акциите паднаа за над 5 отсто

Акциите на „Поп Март“ (Pop Mart International Group Ltd.), производителот на популарната линија играчки Лабубу (Labubu), паднаа за повеќе од 5,5 отсто во петокот, достигнувајќи го најниското ниво од мај, по инцидентот со пренос во живо што повторно го разгоре прашањето за цените на производите.

Падот на акциите котирани на берзата во Хонгконг следуваше по вирално видео во кое вработен на „Поп Март“ наводно го доведе во прашање квалитетот на производ од серијата „кутија со изненадување“ (blind box) за време на пренос во живо во четвртокот, објави кинескиот медиум „Кавер“ (The Cover). Спорниот производ, приврзок за телефон од таа серија, со цена од 79 јуани (11 долари) – предизвика лавина реакции на социјалните мрежи.

Bloomberg

На платформите Шаохонгшу (Xiaohongshu) и Веибо (Weibo) корисниците ја критикуваа ценовната политика на компанијата, при што еден коментар гласеше: „Овие пластични мониста чинат помалку од два јуана, но опседнатоста на младите со нив ја направи ‘Поп Март’ премногу самоуверена.“

Друг корисник се согласи, велејќи дека вработениот всушност ја кажал вистината и дека производите на „Поп Март“ се прескапи. „Компанијата ја истражува ситуацијата“, изјави портпарол на „Поп Март“ за „Блумберг њуз“.

Контроверзиите се појавуваат во време кога пошироко забавува продажбата на секундарниот пазар од серијата Лабубу. До петокот наутро, платформата за препродажба и тргување Чјиандао (Qiandao) прикажуваше пад од 16 отсто на просечните цени за сет од 14 мини-фигури Лабубу во последниот месец – под официјалната малопродажна цена од 1.106 јуани. Поголемите кукли Лабубу забележаа едноцифрен пад во истиот период.

Падот на цените на секундарниот пазар може да е поврзан со зголеменото снабдување и напорите на компанијата да ја зголеми заработката, наведуваат аналитичарите на „Голдман Сакс“ (Goldman Sachs Group Inc.), предводени од Мишел Ченг. Според нив, податоците за цените во реално време сè повеќе влијаат на расположението на пазарот кај брендовите засновани на интелектуална сопственост.

Акциите на „Поп Март“ се под притисок во последните месеци и се намалени за околу 38 отсто од крајот на август, поради собирање профит и загриженост околу одржливоста на побарувачката. Компанијата со седиште во Пекинг, која стана позната како најжешка потрошувачка акција во Кина, доживеа подем благодарение на популарноста на своите меки играчки со широки насмевки – особено ликот Лабубу.

Аналитичарите на „Санфорд Ц. Бернштајн“ (Sanford C. Bernstein), предводени од Мелинда Ху, очекуваат продажбата на Лабубу да го достигне својот врв во 2026/2027 година, но предупредуваат на ризиците поврзани со прекумерната зависност од еден лик. „Веројатноста за повторување на истиот успех со нови ликови е извонредно мала“, наведуваат тие во нивната анализа.

Сепак, според „Морган Стенли“ (Morgan Stanley), друг лик на „Поп Март“ – Твинкл Твинкл (Twinkle Twinkle) – веќе се приближува до Лабубу по популарност, но се соочува со недостиг од производи.