Зошто Ворен Бафет и Ли Ка-шинг собираат готовина?

Едниот е познат како Оракулот од Омаха (Oracle of Omaha), другиот како Супермен. Ворен Бафет и Ли Ка-шинг се двајцата најпочитувани инвеститори на Запад и Исток. Сега, кога и двајцата, во нивните 90-ти години и со само две години разлика по возраст, трупаат готовина, дали е тоа предзнак за голем финансиски пад?

Готовинскиот куп на „Беркшир Хатавеј“ (Berkshire Hathaway Inc.) на Бафет веќе е предмет на неконтролирано пазарно шпекулирање. Конгломератот влегува во 2025 година со 334 милијарди долари или рекордни 29 проценти од вкупните средства.

Неодамнешните корпоративни акции на „Хачисон холдинг“ (CK Hutchison Holdings Ltd.) само ќе ги зголемат нагаѓањата. Конгломератот со седиште во Хонгконг непрестано се раздолжува од 2020 година. Откако таа година му ги продаде средствата на своите европски кули на „Селнекс телеком“ (Cellnex Telecom SA) за 10 милијарди евра (11 милијарди американски долари), ги задржа средствата, а може да остане и без долгови по контроверзната продажба од 19 милијарди долари на повеќето негови пристаништа на концернот „Блекрок“ (BlackRock Inc.). „Хачисон холдинг“ не објави специјални дивиденди при објавувањето на заработката минатата недела.

Bloomberg Mercury

 

И двајцата имаат долга историја на заработки во вистински момент. Како што напиша мојот колега Нир Кајсар, распределбата на готовина на „Беркшир“ значително варираше со текот на годините, се повлекуваше кога американските акции беа скапи, а се распоредуваше кога пазарите паѓаа. Нејзините инвестиции во Банката на Америка (Bank of America Corp.), кои датираат од глобалната финансиска криза, донесоа повеќе од 30 милијарди долари профит.

Чувството на Ли за тоа кога да продава е исто така чудо. Во 1999 година тој го продаде контролниот удел во британскиот оператор за мобилна телефонија „Оринџ“ (Orange) за околу 15 милијарди долари, токму во време блиску до врвот на балонот дот-ком (dot-com). Кон крајот на 2017 година бизнисменот продаде облакодер во централната деловна област на Хонгконг за рекордни 5,2 милијарди долари. Нешто повеќе од една година подоцна, секторот за градски канцелариски недвижности достигна врв. Оттогаш, висококатницата доживеа голем промет; кинеските претприемачи за недвижности што презедоа некои катови, мислејќи дека можат да го надмудрат Супермен, се вознемирија и мораа да направат итна продажба.

За бидеме начисто, резервите од готовина на оваа двојка инвеститори не мора нужно да значат дека крахот демне веднаш зад аголот. Со оглед на нивните гигантски имоти, Оракулот и Супермен никогаш не можат лесно и целосно да излезат од пазарот, дури и кога би можеле да ја предвидат иднината. Наместо тоа, тие треба да се ослободат од имотите додека сè уште има купувачи. Како и да е, одржувањето на дел од имотот има смисла бидејќи може да дојде до добри зделки, веројатно по големите корекции на пазарот.

Многу исполитизираниот договор за пристаништата на „Хачисон“, на пример, е интересен. Само две пристаништа на Панама беа на геополитички нишан, па зошто „Хачисон холдинг“ ги продава сите свои операции надвор од Хонгконг и континентална Кина? Понатаму, Пекинг покажа незадоволство, отиде дотаму што, наводно, им кажува на своите државни фирми да се откажат од каква било деловна соработка со семејството Ли. Сепак, 96-годишникот, кој повеќе не е вклучен во секојдневните деловни операции, но учествуваше во преговорите, тврдоглаво продолжува со оваа работа. Дали е тоа затоа што очекува пристаништата низ светот да претрпат структурен пад сега кога Доналд Трамп се врати во Белата куќа?

Засега операциите на пристаништата забележуваат големи профити. Заработката пред камати и даноци минатата година скокна за 24 проценти. Дополнително, овој бизнис би можел да оствари повисоки маржи со поголема автоматизација. Со оглед на досието на Ли, не е неразумно да се сомневаме дека тој продава кога финансиите сè уште изгледаат убаво.

На некој начин резервите од готовина на „Беркшир“ се побенигни и полесни за разбирање. Бафет (94) објасни дека најголемиот дел од парите на компанијата ќе биде распореден во американските акции, а сите знаеме дека американската берза е скапа, особено кога станува збор за омиленото мерило за вреднување на легендарниот инвеститор, односот на вредноста на берзата во однос на големината на американската економија.

Bloomberg Mercury

 

За споредба, загрижувачка е решеноста на Ли да го продаде одделот за пристаништа на „Хачисон холдинг“ во време кога економистите сè уште дебатираат дали глобалната трговија е завршена или едноставно повторно се мапира. Што гледа тој?

За инвеститорите е време да бидат претпазливи. Што се однесува до американскиот претседател Доналд Трамп, тој не треба да се радува на продажбата на пристаништата во Панама; Ли е вистинскиот трговец овде.

 

Во моментов нема коментари за веста. Биди прв да коментира...

Остави коментар