Ворен Бафет купи удел во познат производител на пица

„Беркшир Хатавеј“ (Berkshire Hathaway Inc.) купи акции во „Доминос“ (Domino’s Pizza Inc.) и во „Пул корп“ (Pool Corp.) за време на третиот квартал, додека претседателот Ворен Бафет намали некои од долго држените инвестиции. Акциите на двете компании скокнаа во доцното тргување во Њујорк.

Основачот на конгломератот со седиште во Омаха, Небраска, купи околу 1,3 милион акции во рестораните за пица, давајќи му на „Беркшир“ удел од 3,6 отсто, вреден околу 550 милиони долари, соопшти компанијата во поднесок од четвртокот.

„Беркшир“ исто така купи 1 отсто удел во дистрибутерот на опрема за базени „Пул корп“, вреден околу 152 милиони долари.

Во меѓувреме, фирмата на Бафет продаде поголем дел од своите акции во трговецот со козметика „Улта бјути“ (Ulta Beauty), удел што првично го стекна во претходниот квартал. Акциите на „Улта бјути“ паднаа за повеќе од 4 отсто во продолженото тргување. Акциите на „Доминос“ и на „Пул“ пораснаа за повеќе од 7 отсто веднаш по соопштението.

Деведесет и четиригодишниот инвестициски гуру, чии потези се широко следени и имитирани од посветени следбеници, намали некои од своите главни вложувања во последните месеци, намалувајќи го уделот во „Епл“ (Apple Inc.) за околу 25 отсто и во Банката на Америка (Bank of America Corp.), носејќи ги под прагот од 10 отсто.

Продажбата на акциите на „Епл“ ја намали алокацијата на„Беркшир“ во технолошкиот сектор за околу 3 отсто. Вкупно, „Беркшир“ пријави нето-продажба на акции од 34,6 милијарди долари во трите месеци до септември. Во комбинација со отсуството на откуп на акции за време на кварталот, продажбата ја зголеми готовинската резерва на „Беркшир“ на рекордни 325,2 милијарди долари.

„Би сакале да ја потрошиме“, им рече Бафет на акционерите за готовинската резерва во мај, „но нема да ја потрошиме освен ако не мислиме дека правиме нешто што има многу мал ризик и може да ни донесе многу пари“.

Во моментов нема коментари за веста. Биди прв да коментира...

Остави коментар