Ворен Бафет рече дека донирањето на неговото богатство во добротворни цели по неговата смрт ќе биде отворено за проверка од јавноста, иако 93-годишниот милијардер додаде дека засега сè уште му оди добро.
„Се чувствувам добро, но целосно сфаќам дека играм во продолженијата од натпреварот“, рече главниот извршен директор на „Беркшир Хатавеј“ во писмото до акционерите за Денот на благодарноста. Тој долго време ветува дека повеќе од 99 проценти од неговото богатство ќе оди во филантропија. „По мојата смрт, располагањето со мојот имот ќе биде отворена книга - нема „имагинативни“ трустови или странски ентитети за да се избегне јавен надзор, туку едноставен тестамент достапен за проверка во Судот на округот Даглас“ во Омаха, Небраска, каде што Бафет живее.
Бафет е деветтиот најбогат човек во светот, со нето богатство од 120,8 милијарди долари, според индексот на милијардери на „Блумберг“, а неговото богатство оваа година се зголеми за 13,3 милијарди долари. Во 2010 година, тој го започна „Гивинг плеџ“ (Giving Pledge), со неговите пријатели Бил Гејтс и Мелинда Френч Гејтс, велејќи дека ќе го донира своето богатство или за време на неговиот живот или за време на неговата смрт. Четири години претходно, тој почна да дава огромни донации во фондацијата на Гејтс, како и фондации врзани за неговите деца.
Трите деца на Бафет, кои се на возраст од 65 до 70 години, се извршители на неговиот сегашен тестамент, како и именувани повереници на добротворниот фонд што ќе го добие неговото богатство, се вели во писмото.
„Тие не беа целосно подготвени за оваа страшна одговорност во 2006 година, но сега се“, рече Бафет. „При администрирање на тестаменталниот труст, тројцата мора да дејствуваат едногласно. Поради случајната природа на смртноста, секогаш мора да се назначуваат наследници. Повелбата на трустот ќе биде широка“.
Бафет, исто така, во писмото рече дека донирал акции на „Беркшир Хатавеј“ во вредност од повеќе од 868 милиони долари за добротворни цели, вклучително и една именувана по неговата покојна сопруга, оваа недела. Според писмото, Бафет и дал 1,5 милиони акции од класа Б на Фондацијата „Сузан Томпсон Бафет“ и по 300.000 акции на Фондацијата „Шервуд“, на Фондацијата „Хауард Г.Бафет“ и на Фондацијата „Ново“. Тој ја направи донацијата откако претвори 1.600 акции од класа А во 2,4 милиони акции од класа Б.
.webp){kind=icon}
