Финансискиот директор ја напушти „Екс еј-ај“ на Илон Маск по само три месеци

Главниот  финансиски директор на „Екс еј-ај“ (xAI), Мајк Либераторе, ја напуштил компанијата само неколку месеци откако ја презеде функцијата, наведуваат упатени извори. Неговото заминување остава значајна празнина во стартапот за вештачка интелигенција на Илон Маск.

Либераторе ѝ се приклучи на „Екс еј-ај“ годинава и беше вклучен во дел од напорите за собирање средства, како и во проширувањето на дата-центрите во Мемфис. Но, според „Волстрит журнал“, тој ја напуштил компанијата во јули, само три месеци по почетокот на работата. Веста беше објавена во средата.

Пред да стане дел од „Екс еј-ај“, Либераторе речиси една деценија работел на финансиски позиции во „Ербиенби“ (Airbnb Inc.). Според лице запознаено со прашањето, тој веќе има обезбедено нова работна позиција. Портпаролот на „Екс еј-ај“ не одговорил веднаш на барањето за коментар.

Заминувањето отвора клучна позиција во „Екс еј-ај“, која агресивно собира средства за да ја прошири својата ВИ-инфраструктура, вклучувајќи проекти за дата-центри и чипови за пресметки. Махмуд Реза Банки, поранешен извршен директор во „Туби“ (Tubi), и понатаму работи како финансиски директор на X, социјалната мрежа што Маск годинава ја спои со „Екс еј-ај“.

Џаред Бирчал, кој го води семејниот фонд на Маск и е вклучен во собирањето средства во неговите компании, исто така има голема улога во финансиските одлуки на „Екс еј-ај“, посочува добро упатен извор.

 

Во моментов нема коментари за веста. Биди прв да коментира...

Остави коментар