„Опен еј-ај“ тврди дека Маск игра безмилосно за превласт во вештачката интелигенција

 

„Опен еј-ај“ (OpenAI) го обвинува Илон Маск дека повеќе од една година води „немилосрдна“ кампања за да ѝ наштети на компанијата и го повика судот да му нареди да престане со тоа.

Во судскиот поднесок од средата, компанијата што Маск и Сем Алтман заедно ја основаа пред десет години, наведува дека најбогатиот човек на светот користи правни тужби, објави на социјалните мрежи и напади во медиумите како оружје за да го саботира успехот на „Опен еј-ај“ - сè за да стекне предност за „Екс еј-ај“ (xAI), неговиот стартап за генеративна вештачка интелигенција.

„Маск ги презеде овие чекори за да го забави напредокот на ’Опен еј-ај’ и да ја намали неговата способност ефикасно да се натпреварува на сè поконкурентното поле, но и за да обезбеди и задржи незаслужена предност за ’Екс еј-ај’ - предност што е осмислена за да ја поткопа конкуренцијата во поширока смисла, исклучиво во корист на компанијата на Маск, а на штета на јавниот интерес“, наведуваат адвокатите на „Опен еј-ај“ во поднесокот од сто страници.

 

Во правната борба што Маск ја поведе минатата година, тој го обвини „Опен еј-ај“ дека „ја напуштил својата основачка цел - како непрофитна организација“, кога во 2019 година прифатил милијарди долари поддршка од компанијата „Мајкрософт“ (Microsoft). Тоа се случи по една година откако Маск го напушти Управниот одбор на „Опен еј-ај“.

Bloomberg

 

Федерален судија во Оукленд (Калифорнија) закажа судење за март во случајот за оспорувањето од Маск на плановите на Алтман да го трансформира „Опен еј-ај“ од непрофитна во профитна организација со јавна корист, со што се подготвува терен за високоризичен судир на двајцата милијардери.

Во противтужбите што „Опен еј-ај“ ги поднесе во средата се наведува дека ненадејната понуда од февруари за купување на компанијата за 97,4 милијарди долари, дадена од Илон Маск и коалиција на инвеститори со длабоки џебови, била „лажна понуда“, со цел да се наруши способноста на стартапот да собира средства и да се нарушат неговите односи со инвеститорите и со клиентите.

Сем Алтман, извршен директор на „Опен еј-ај“, тогаш ја отфрли понудата за откуп, велејќи дека компанијата „не е на продажба“, а и одборот на директори исто така ја отфрли понудата.

„Да ја разгледал одборот на ’Опен еј-ај’ искрено понудата, како што е и должен, ќе видел колку е сериозна“, рече адвокатот на Маск, Марк Тобероф. „Значајно е тоа што, според нивните тврдења, плаќањето на пазарната вредност на средствата на ’Опен еј-ај’, наводно, ’се меша’ во нивните деловни планови“.

„Опен еј-ај“ во својот поднесок наведува дека понудата била „и тоа како јавен обид“ вештачки да се надуе вредноста на непрофитната организација и дека „веќе предизвикала забуна“.

Поднесокот вклучува и едно интересно тврдење: „Цената од писмото за намери била шега и референца на ликот 974 Праф од научнофантастичната серија на Иан Бенкс ’Look to Windward’, од која Маск исто така извлекувал имиња и за неколку ракети на ’Спејс екс’ (SpaceX)“.

„Опен еј-ај“ исто така укажува и на проект вреден 100 милијарди долари, наречен „Старгејт“ (Stargate), зад кој стојат „Опен еј-ај“ (OpenAI), „Оракл“ (Oracle) и „Софтбанк“ (SoftBank), а кој го најави Белата куќа наскоро откако претседателот Доналд Трамп ја презеде должноста кон крајот на јануари.

„Во приватност, обидувајќи се да го задуши проектот, кој е уште во повој, Маск го поттикнува секој инвеститор што би го слушал да не инвестира во ’Старгејт’“, се наведува во поднесокот на „Опен еј-ај“.

Маск претходно го обвини „Опен еј-ај“ дека се обидува да ги елиминира конкурентите, како неговата компанија „Екс еј-ај“, така што од инвеститорите бара ветувања дека нема да ги финансираат ривалите - тоа е тврдење што „Опен еј-ај“ го негира.

„Опен еј-ај“ минатата недела соопшти дека финализирал рунда на финансирање вредна 40 милијарди долари, предводена од „Софтбанк“. Со овој договор вредноста на компанијата е проценета на 300 милијарди долари, вклучувајќи ги веќе собраните средства, што е речиси двојно повеќе во однос на претходната процена од 157 милијарди долари од октомври.

Кон крајот на март, „компанијата што Маск ја основал во 2023 година ја купила социјалната мрежа X (порано позната како Твитер), која исто така ја контролира Маск. Со тоа, новата обединета фирма, под името „Екс-еј-ај холдингс“ (XAI Holdings), според извештајот на „Блумберг“, добила проценета вредност поголема од сто милијарди долари.