Глобалниот прекин на мрежата на фирмата за веб-безбедност „Клаудфлер“ (Cloudflare Inc.) е решен по неколку часа, попладнево денеска. ЧетГПТ (ChatGPT) и платформата за социјални мрежи X беа меѓу веб-страниците на кои им беше блокиран пристапот за корисници.
Портпарол на „Клаудфлер“ изјави дека компанијата забележала „скок во необичен сообраќај“ кон една од нејзините услуги околу 6:20 часот наутро по источно време, што предизвикало дел од сообраќајот што поминува низ нејзината мрежа да е прекинат. Проблемот беше решен во рок од шест часа, објави компанијата.
Причината за прекинот била конфигурациска датотека што автоматски се генерира за управување со сообраќајот кога има закани, изјави Џеки Датон, портпарол на „Клаудфлер“. Немало докази за сајбер напад или злонамерна активност.
Инаку, проблемот зафати и повеќе македонски веб-страници, вклучувајќи и на медиуми, агрегатори на вести и институции.
„Клаудфлер“ истражува проблем што „потенцијално влијае на повеќе клиенти“, соопшти претходно компанијата со седиште во Сан Франциско на својата веб-страница. Оттаму посочија дека „Клаудфлер“ имал проблеми со порталот за поддршка на клиенти и требало да изврши закажано одржување порано во текот на денот.
Околу еден час по прекинот, „Клаудфлер“ посочи дека „забележува како услугите се обновуваат“, но предупреди дека клиентите ќе продолжат да гледаат „стапки на грешки повисоки од нормалните додека продолжуваат со напорите за санација“. Во 8 часот наутро по њујоршко време компанијата посочи дека „продолжува да истражува“.
Софтверот на „Клаудфлер“ го користат стотици илјади компании низ целиот свет, а истиот тој дејствува како тампон помеѓу нивните веб-страници и крајните корисници, работејќи на заштита на нивните страници од напади што би можеле да ги преоптоварат со сообраќај.
Системот на „Клаудфлер“ веќе неколкупати испаднал од функција. Во јули 2019 година грешка во софтверот предизвика еден дел од мрежата да ги исцрпи компјутерските ресурси од остатокот од компанијата, што доведе до тоа илјадници веб-страници низ целиот свет што се потпираат на „Клаудфлер“ да бидат исклучени дури и до 30 минути. За време на тој прекин беа погодени повеќе услуги, вклучувајќи ги и платформата за блогирање „Медиум“ (Medium), провајдерот за видеоигри и интеракција „Дискорд“ (Discord), „Шопифај“ (Shopify Inc.), музичката платформа „Саунд клауд“ (SoundCloud Ltd.), платформата за тргување со биткоини „Коинбејс“ (Coinbase Inc.) и страницата за онлајн складирање „Дропбокс“ (Dropbox Inc).
„‘Клаудфлер’ е најголемата компанија за која никогаш не сте слушнале“, вели Алан Вудвард, професор по сајбер-безбедност на Универзитетот во Сари, додавајќи дека прекинот е уште еден пример за зависноста на интернетот од „релативно малку играчи“.
„Луѓето немаат друг избор освен да зависат од релативно малку големи имиња“, рече тој.
.webp){kind=icon}
