Сем Алтман: Животот на Маск е полн со лична несигурност

Извршниот директор на „Опен еј-ај“ (OpenAI), Сем Алтман, рече дека компанијата „не е на продажба“ и дека Илон Маск најверојатно се обидува да го забави напредокот на компанијата со оваа понуда.

„Мислам дека тој веројатно само се обидува да нѐ забави. Тој е очигледно конкурент“, рече Алтман во интервју за ТВ „Блумберг“ во вторникот, на маргините на самитот на вештачката интелигенција во Париз. „Посакувам да можам да се натпреварувам со градење подобар производ, но мислам дека имаше многу тактики, многу, многу тужби, секакви други луди работи, а сега ова“.

Постои долгогодишен конфликт помеѓу Маск и Алтман, а фокусот на конфликтот е загриженоста на Маск дека „Опен еј-ај“ отстапува од основните принципи на непрофитна организација.

Алтман претходно ја отфрли изненадувачката понуда од 97,4 милијарди долари од групацијата предводена од Маск, шегувајќи се: „Не, благодарам, ама ќе го купиме Твитер за 9,74 милијарди долари, ако сакате“.

Основачот исто така го критикуваше и Маск во интервјуто, велејќи дека „целиот негов живот е веројатно полн со лична несигурност, жал ми е за него“.

Алтман додаде дека одборот на „Опен еј-ај“ истражува низа опции за идни операции. „Но продажбата на производи со вештачка интелигенција не е на маса. ’Опен еј-ај’ не е на продажба. Мисијата на ’Опен еј-ај’ не е на продажба“, додаде тој.