„Опен еј-ај“ тргнува по 30 милијарди долари во нова рунда на финансирање

„Опен еј-ај“ (OpenAI) има цел да собере најмалку 30 милијарди долари од инвеститори во нова рунда финансирање, според упатени извори, откако стартапот за вештачка интелигенција ги одложи своите планови за иницијална јавна понуда (ИПО) на акции.

Компанијата бара процена од околу 1,4 билион долари, без да ги вклучува собраните средства, рекоа изворите, што потенцијално повторно би ја поставило над долгорочниот ривал „Антропик“ (Anthropic) според неговата најнова приватна пазарна процена. „Блумберг њуз“ претходно објави дека „Опен еј-ај“ размислува за нова рунда со процена од 1,2 билион долари.

Разговорите за собирање средства се во рана фаза и би можеле да се променат, посочија изворите, кои зборуваа под услов на анонимност бидејќи информацијата не е јавна. Побарувачката за рундата ја предводат инвеститорите, рече едно лице, бидејќи компанијата забележува силен раст на приходите. „Опен еј-ај“ одби да коментира.

Креаторот на ЧетГПТ е вовлечен во жестока битка со „Антропик“ за привлекување повеќе деловни клиенти и зголемување на приходите пред нивните планирани котирања на Волстрит. Двете компании поднесоа доверливи документи за излегување на берзата, при што се очекува „Антропик“ да го одржи своето јавно котирање најрано оваа есен.

Извршниот директор на „Опен еј-ај“, Сем Алтман, неодамна рече дека неговата компанија ќе се воздржи од излегување на берзата оваа година. Во интервју за телевизијата „Блумберг“ во вторникот тој рече дека компанијата сака да помине низ периодот на зголемена загриженост околу безбедноста на вештачката интелигенција без притисокот што го носи тоа да се биде новокотирана јавна компанија.

„Опен еј-ај“ моментално се „приспособува“ на „ново ниво“ на способностите на вештачката интелигенција и на дополнителните безбедносни барања што одат со тоа, рече Алтман.

„Само сакаме да застанеме цврсто на нозе и да се увериме дека разбираме како да работиме на овој нов начин, да можеме да донесеме некои од овие одлуки што се пред нас без притисокот да бидеме новокотирана јавна компанија“, рече Алтман, додавајќи дека верува оти инвеститорите ќе бидат „трпеливи“ во однос на плановите за ИПО.

Најновото собирање средства има  цел да служи како отскочна рунда, за да му обезбеди на „Опен еј-ај“ дополнителен капитал наместо ИПО, посочуваат изворите. Компанијата последен пат собра 122 милијарди долари во март, при процена од 852 милијарди долари, вклучувајќи ги и средствата.

Како и нејзините конкуренти, „Опен еј-ај“ се соочи со зголемено внимание поради потенцијалот вештачката интелигенција да предизвика катастрофална штета, вклучувајќи ги и сајбер-безбедносните пробиви. Технологијата на „Опен еј-ај“ беше вклучена во голем број безбедносни инциденти, вклучувајќи го и целењето на веб-страници на австралиската влада. Компанијата исто така оваа недела соопшти дека нема да го објави својот најнов модел, ГПТ-6.1 Астра (GPT-6.1 Astra), бидејќи системот не ги исполнувал нејзините интерни безбедносни стандарди.

Алтман го поддржа планот на Дарио Амодеи од „Антропик“ за забавување на развојот на најнапредните модели на вештачка интелигенција и ангажирање независни оценувачи што ќе помогнат во заштитата на технологијата.

Во исто време,„Опен еј-ај“ продолжува агресивно да се натпреварува на сè позаситениот пазар за агенти со вештачка интелигенција што извршуваат посложени задачи за корисниците. На настанот за програмери на компанијата во вторникот, „Опен еј-ај“ претстави нов агент со вештачка интелигенција наречен Дотс (Dots), кој е постојано активен и е подготвен директно да се натпреварува со производи како Мјуз (Muse) од „Мета“ (Meta Platforms Inc).

„Опен еј-ај“ исто така ја менува својата понуда на претплати со воведување нова премиум претплата од 500 долари, со повисоки лимити на користење и поголеми брзини на обработка, и со намалување одредени лимити на користење во пакетот од 200 долари.

Нашироко сметана за компанија што во голем дел од годината беше во подредена позиција, „Опен еј-ај“ работеше на стеснување на својот фокус на производите и забележа обновен замав кај алатките што го поедноставуваат процесот на програмирање.

Стапката на приходите на „Опен еј-ај“ забрза во текот на летото и надмина 40 милијарди долари, објави „Блумберг њуз“ во август. Приходите на компанијата според тековната годишна стапка пораснале за 70 отсто од јули, посочи едно лице.