„Опен еј-ај“ ја става безбедноста на прво место и годинава не излегува на берза

„Опен еј-ај“ (OpenAI) годинава нема да излезе на берза, бидејќи ќе се фокусира на решавање на безбедносните прашања поврзани со вештачката интелигенција (ВИ), изјави извршниот директор на компанијата, Сем Алтман, во интервју за „Форчун“ (Fortune).

Алтман изјави дека оваа година не би била добар момент за иницијална јавна понуда на акции (ИПО) и дека „Опен еј-ај“ нема да излезе на берза пред следната година, се наведува во снимката од интервјуто што „Форчун“ ја објави во саботата.

„Сметам дека е неприфатливо да преземеме ризик од околу 10 отсто да го убиеме човештвото до крајот на оваа деценија“, изјави Алтман. „Мислам дека сега влегуваме во нова ера и дека, како и порано во слични моменти на одлука, ќе мора да го промениме начинот на кој постапуваме за да обезбедиме оваа технологија да му користи на целото човештво, а притоа никој да не презема ни приближно толку голем ризик.“

Овие изјави доаѓаат во момент кога Алтман, извршниот директор на „Антропик“ (Anthropic), Дарио Амодеи, и соосновачот и директор на компанијата „Екс еј-ај“ (xAI), Илон Маск, во саботата укажаа на потребата да се забави темпото на развојот на ВИ поради сè поголемите ризици што оваа технологија ги претставува за човештвото. Тоа е редок случај лидерите на трите главни конкуренти во оваа област да се согласат за некое прашање.

Загриженоста дека ВИ би можела да претставува егзистенцијална закана стана дел од пошироката јавна дебата, за што придонесе и медиумски многу коментираната порака на истражувач од „Антропик“ оваа недела, кој си замина поради страв од егзистенцијални ризици и оценката дека неговата компанија се однесува неодговорно, односно дека ВИ би можела „да нè убие сите до крајот на деценијата“. Еден од вработените во „Антропик“ на платформата X наведе дека веројатноста за таков исход е „поголема од 10 отсто во следната деценија“.

„Мислам дека едно од клучните начела околу кои сите треба да се согласиме е тоа дека не смееме да преземаме потези кои би можеле да доведат до тоа да ја изгубиме контролата врз иднината поради ВИ“, изјави Алтман за „Форчун“.

„Опен еј-ај“ во јуни поднесе барање за ИПО, иако компанијата соопшти дека времето на излегување на берза сè уште не е утврдено. „Антропик“ исто така се подготвува за излегување на берза, кое според вредноста би можело да го надмине рекордното овогодишно ИПО на компанијата „Спејс екс“ (SpaceX) вредно 86,2 милијарди долари, вклучувајќи ја и опцијата за дополнителна продажба на акции.

Од „Опен еј-ај“ не сакаа да ги коментираат изјавите на Алтман.