„Алибаба“ лансира паметни очила со вградена вештачка интелигенција

„Алибаба“ (Alibaba Group Holding Ltd.) започна со продажба на своите први паметни очила напојувани од нејзините модели „Квен еј-ај“ (Qwen AI), означувајќи редок исчекор во тој сегмент.

Новите очила „кварк С1“ (Quark S1) вклучуваат вградени проѕирни дисплеи што прикажуваат контекстуални информации за видикот на корисникот на околината. Опремен со камери, микрофони со коскена спроводливост и заменливи батерии што траат 24 часа, овој нов производ има цел да му понуди на кинескиот пазар нешто слично на паметните очила „рејбан“ (Ray-Ban) на „Мета платформс“ (Meta Platforms Inc).

 

Ова означува продолжување на амбициозната реорганизација на „Алибаба“ во бизнис што првенствено се потпира на вештачката интелигенција (ВИ). Компанијата направи голем пресврт со објавувањето на апликацијата Квен минатата недела, консолидирајќи ги своите различни ВИ-услуги за потрошувачите во една надградена програма, која брзо привлече повеќе од десет милиони корисници. Главниот извршен директор Еди Ву неделава изјави дека компанијата забележала „исклучително задржување на корисниците“ со новото издание. „Алибаба“ исто така го интегрираше пакетот „Квен“ во својот десктоп-прелистувач „Кварк“ и сега својот досег го проширува и таму.

Заедно со С1, чија почетна цена започнува од 537 американски долари, „Алибаба“ ќе понуди модел „кварк Г1“ од 268 долари, кој ги избегнува микро-ОЛЕД (OLED) екраните. С1 е достапен за купување веднаш, но во национални рамки. Меѓународните верзии ќе бидат достапни следната година, а некои ќе се продаваат преку платформи како „Алиекспрес“ (AliExpress), според портпаролот на единицата „Кварк“ на „Алибаба“.

Паметните очила, особено тие што промовираат ВИ-можности, како што е транскрипцијата, се проширија во Кина во текот на изминатата година. Многу од нив досега доаѓаат од стартапи како „Ивен риалитис“ (Even Realities), кои имаат цел да ги дополнат конвенционалните очила, а не одново да ги измислуваат. Според одредени анализи, само оваа година заклучно со септември се реализирани 1,6 милион пратки на паметни очила во Кина, при што „Шаоми“ (Xiaomi Corp.) тврди дека продале околу една третина. Таа бројка се зголемува на два милиона единици откако ќе се вклучат и очилата со вградени екрани.

Неодамна, очилата „метин рејбан“ (Metine Ray-Ban Display) на „Мета“ од 799 долари покажаа поамбициозен пристап кон категоријата, со интегрирани екрани и посебна белезица за контрола на гестови. Најнапредниот модел на „Мета“ е помасовен, потежок и поскап од вообичаено, но ги исцрта контурите на ветувачки пат за развој.

„Алибаба“ интегрира многу од силните страни на својот екосистем со новиот хардвер „Кварк“, вклучувајќи ги онлајн трговецот „Таобао“ (Taobao), платформата за резервации на патувања „Флиџи“ (Fliggy) и плаќањата преку „Алипеј“ (Alipay). Компанијата исто така соработува со соседот од Хангжу, „Нет изи“ (NetEase Inc.), и „Тенсент холдингс“ (Tencent Holdings Ltd.) од Шенжен, обезбедувајќи ги нивните музички услуги „Нет изи клауд мјузик“ (NetEase Cloud Music) и „КК мјузик“ (QQ Music).