„Опен еј-ај“ возврати на тужбата на Маск за „алчност наспроти алтруизам“

„Опен еј-ај“ (OpenAI) го обвини Илон Маск за вознемирување во правната борба што се одвива додека стартапот го разгледува планот да се префрли на профитен бизнис модел.

Помалку од два месеца откако ја напушти својата прва тужба против „Опен еј-ај“, Маск поднесе жалба во август тврдејќи дека ко-основачите Сем Алтман и Грег Брокман го манипулирале да инвестира во стартапот, кој на почетокот беше непрофитен, а потоа се збогатиле преку ценетата технологија и средства на компанијата.

„Опен еј-ај“  во моментов има покомпликувана структура која вклучува профитен оддел  - која беше создаден во 2019 година за да помогне во финансирањето на високите трошоци за развој на модели за вештачка интелигенција, и оттогаш има привлечено милијарди надворешни инвестиции од „Мајкрософт“ (Microsoft Corp.) и од други фирми.

„Поднесокот е последниот потег во сè почудната кампања на Илон Маск за вознемирување на 'Опен еј-ај' поради неговата конкурентска предност“, рекоа Алтман и компанијата во допис до судот во вторникот, барајќи од федералниот судија во Оукланд, Калифорнија да ја отфрли жалбата на Маск.

Маск не одговори веднаш на барањето за коментар испратено до неговата социјална платформа Х.

Спорот ескалира бидејќи брзорастечката компанија која е во првите редови на иновациите со вештачка интелигенција размислува да премине од својот сегашен непрофитен модел  - необична структура што ги фрустрира инвеститорите  - кон профитен бизнис, како што претходно објави „Блумберг њуз“ (Bloomberg News) во септември.

Таквиот потег ќе ги смири поддржувачите на компанијата, но ќе биде комплициран за извршување. Како дел од транзицијата, „Опен еј-ај“ разговараше да му додели на Алтман од капиталот на компанијата  - удел кој може да вреди повеќе од 10 милијарди долари, иако одборот на „Опен еј-ај“ соопшти дека не разговарал за конкретни бројки.

„'Опен еј-ај' е посветен на безбедниот и корисен развој на вештачката општа интелигенција (AGI)“, велат компанијата и Алтман во нивниот поднесок. „Маск еднаш го поддржа 'Опен еј-ај' во таа мисија, но го напушти проектот кога неговиот обид да доминира во него не успеа“, велат тие.

Ова беше бурна година за стартапот со седиште во Сан Франциско. Помалку од 12 месеци откако управниот одбор на компанијата го отпушти, а потоа брзо го врати Алтман како главен извршен директор, „Опен еј-ај“ го реконструира својот одбор, повеќе од двојно го зголеми бројот на вработени и изгуби голем број клучни лидери  - вклучувајќи ги ко-основачот Илја Сутскевер и главната технолошка директорка Мира Мурати.

Сепак, превирањата не ја намалија нејзината амбиција или интересот на инвеститорите за компанијата: во последниве месеци, „Опен еј-ај“ продолжи да пласира голем број услуги за вештачка интелигенција на растечки список на бизниси и потрошувачи, а во октомври постигна една од најголемите приватни инвестиции досега, при што се собрани 6,6 милијарди долари со проценка на вредноста од 157 милијарди долари.

Во јуни, Маск повлече слична тужба поднесена во државниот суд во Калифорнија, во која тој тврдеше дека врските на „Опен еј-ај“ со најголемиот инвеститор, „Мајкрософт“, го насочиле стартапот да се оддалечи од својата мисија да развие одговорна вештачка интелигенција. „Опен еј-ај“ одговори дека Маск промовира „ревизионистичка историја“ и ги нарече неговите правни тврдења „некохерентни“.

Во својата последна жалба, Маск ја опишува сагата за „Опен еј-ај“ како „школска приказна за алтруизмот наспроти алчноста“.

Адвокатите на милијардерот претприемач тврдат дека Алтман „намерно му се додворувал и го измамил Маск“, кој изрази загриженост за заканите од вештачката интелигенција.

Маск лансираше совоја компанија за вештачка интелигенција „Екс еј-ај“ (xAI Corp) во 2023 година како конкурент на „Опен еј-ај“. Тој се бори против наводите во тужбата во Делавер дека неговиот стартап за вештачка интелигенција ја лишил една од неговите други компании, „Тесла“ (Tesla Inc.), од таленти и ресурси на штета на акционерите во производителот на електрични возила.