Цената на бакарот на рекорд бидејќи проблемите со снабдувањето водат кон дефицит

Бакарот достигна нов рекорд на берзата во Лондон, а изгледите за скорашно ублажување на тензиите меѓу САД и Кина обезбедија нов катализатор за силен раст изграден врз падовите во снабдувањето со рудници и трговските нарушувања предизвикани од царините.

Тримесечните фјучерси денеска се искачија на 11.146 долари за тон на Лондонската берза за метали, надминувајќи го претходниот врв што беше поставен во 2024 година. Од почетокот на годината металот што е индустриски основен производ и показател за глобалниот раст е зголемен за повеќе од една четвртина и е на пат да ја оствари својата најдобра година по 2017-та.

Беше бурна година за таа стока, со тешкотии во големите рудници во Чиле, Африка и Индонезија што ги задушија глобалните резерви, додека царинските политики на американскиот претседател Доналд Трамп предизвикаа екстремни нарушувања на цените помеѓу САД и глобалната референтна вредност поставена на Лондонската берза.

Bloomberg Mercury

 

Трговците повлекоа огромни количества бакар во САД во очекување на предложените давачки за металот претходно годинава, искористувајќи го порастот на цените на њујоршката берза Комекс.

Ветераните за метали предвидуваат дека бакарот годинава ќе достигне вредност од 12.000 долари.

Во август Трамп конечно одлучи да ги изостави наметнатите давачки за металот и, наместо тоа, остави отворена врата за бакар со додадена вредност од 2027 година. Тоа доведе до континуирано гравитирање на бакарот кон САД, влошувајќи ги притисоците врз понудата за купувачите од други места.

Bloomberg Mercury

 

Со оглед на тоа што рудниците низ светот се намалуваат, а американските резерви всушност се зголемуваат, „Морган Стенли“ (Morgan Stanley) предвидува дека глобалниот пазар на бакар во 2026 година ќе се соочи со својот најтежок дефицит во повеќе од 20 години.

Рударите со години се борат да го одржат чекорот со побарувачката за бакар, но оваа година индустријата беше потресена од големи инциденти во операциите што ги водат „Фрипорт Мекморан“ (Freeport McMoRan Inc), „Ајвенху мајнс“ (Ivanhoe Mines Ltd) и чилеанскиот „Коделко“ (Codelco), како и оперативни пречки во многу други големи наоѓалишта. Неделава „Анголо американ“ (Anglo American Plc) предупреди дека производството на бакар од најважниот рудник на оваа компанија веројатно ќе биде пониско од очекуваното во следната година. Слични предупредувања стигнаа и од „Тек ресурсис“ (Teck Resources Ltd.).

Според ЦРУ (CRU Group), производствените проблеми значат дека вкупното глобално годишно производство на бакар е на пат да се намали за првпат од почетокот на пандемијата.

Трговска анксиозност

Исто така, ова беше мешана година за основната побарувачка, при што долгорочниот оптимизам околу растечката употреба на обновливи извори на енергија, електрични возила и центри за податоци беше компензиран од понепосредната загриженост поради растечката трговска војна.

Сепак, потрошувачката во Кина досега се покажа отпорна, при што Пекинг се обврза „значително“ да го зголеми уделот на потрошувачката во својата економија. Сега се зголемуваат надежите дека Трамп и неговиот кинески колега Шји Џјинпинг наскоро ќе постигнат договор за намалување на трговските тензии меѓу двете најголеми економии во светот.

Трамп утре треба да се сретне со Шји во билатерална форма на маргините на состанокот на АПЕК во Јужна Кореја. Трамп веќе зборуваше за изгледите за договор меѓу двете земји, велејќи дека очекува да ги намали царините што САД ги воведоа за кинеските стоки поради кризата со фентанилот.

„Цените на бакарот се поддржани од растечкиот апетит за ризик поради оптимизмот за потенцијален трговски договор меѓу САД и Кина“, рече Крег Ланг, главен аналитичар во ЦРУ (CRU Group). Металот е исто така поддржан и од грижата за физичкото затворање на пазарите надвор од САД, рече тој.

Бакарот, заедно со другите стоки чија цена се одредува во американски долари, оваа година е потпомогнат и од слабоста на валутата, што ги прави суровините попривлечни за странските купувачи. Денеска се очекува американските Федерални резерви (Фед) повторно да ги намалат каматните стапки, што може да му наштети на доларот.

Цените на бакарот на Лондонската берза утрово пораснаа за 0,4 проценти, на 11.085,50 долари за тон, во 9:34 часот по лондонско време, продолжувајќи го својот годишен раст од над 26 проценти. Движењето на вредноста на другите метали е мешано, при што алуминиумот и цинкот забележаа мали добивки, додека никелот, оловото и калајот се тргуваа со мали промени.