Рекордна цена на бакарот како резултат на подготвеноста на САД и Кина за трговски договор

Бакарот достигна рекордна цена, а САД и Кина се на праг на сеопфатен договор за намалување на трговските тензии, ублажувајќи го големиот ризик за глобалниот економски раст.

Цените на Лондонската берза за метали (глобалниот репер) се зголемија за дури 1,2 отсто и достигнаа 11.094 долари за тон, со што бакарот го надмина рекордот од првата половина на 2024 година за 10,50 долари.

Трговските преговарачи на САД и Кина вчера ги завршија разговорите, кои се чини дека доведоа до договор што претседателите Доналд Трамп и Шји Џјинпинг треба да го финализираат во текот на неделава. Заканата на Трамп за 100 отсто царини не е веќе во игра, а Пекинг ќе ги паузира плановите за проширување на контролата на извозот на ретки метали на една година, според американскиот министер за финансии Скот Бесент.

Bloomberg Mercury

 

Бакарот достигна рекордно високо ниво од 11.104,5 долари за тон во мај минатата година, а потоа одново ја достигна границата од 11.000 долари во текот на овој месец. Оттогаш се тргува по нестабилна цена бидејќи Вашингтон и Пекинг зазедоа тешки позиции во пресрет на трговските разговори. Силните перформанси на металот оваа година, зголемени за околу една четвртина, во голема мера се темелат на серија прекини во рудниците во главните земји производители.

„Фрипорт Мекморан“ (Freeport-McMoRan Inc.) во септември ги намали своите прогнози за продажба на бакар по смртоносната несреќа во нивниот гигантски рудник „Грасберг“ (Grasberg) во Индонезија. Комплексот Камоа-Какула на „Иванху мајнс“ (Ivanhoe Mines Ltd.) во Демократска Република Конго исто така претрпе големи падови во производството.

Падот на доларот годинава додаде дополнителен импулс на металите, правејќи ги стоките со цена во американската валута попривлечни. Мерачот на силата на доларот падна за околу осум проценти од средината на јануари бидејќи инвеститорите се обложуваат дека американските Федерални резерви дополнително ќе ги намалат каматните стапки.

Цената на бакарот исто така го одразува поширокиот оптимизам околу енергетската транзиција. Групацијата БХП (BHP Group), најголемиот рудар во светот, предвидува зголемување на глобалната побарувачка за околу 70 проценти до 2050 година и на овој метал му дава приоритет за раст.

Утрово, во рамките на азиското тргување, бакарот имаше цена повисока за 0,5 проценти (11.014,50 долари за тон). Цената на алуминиумот се искачи за 0,5 проценти и е на пат да оствари највисоко затворање во повеќе од три години, а цинкот се искачи за 0,3 отсто.