text size
Сите очи се вперени во следните чекори на Фед. Релативно придушената инфлација, во комбинација со знаци за забавување на растот на вработеноста, го поттикна Волстрит бидејќи растат очекувањата дека Фед за првпат годинава ќе ги намали каматните стапки.
Основниот индекс на потрошувачки цени, кој ги исклучува нестабилните цени на храната и енергијата, во август се зголеми за 0,3 проценти во однос на јули, според Бирото за статистика на трудот на САД. Без цените на храната и на енергијата, инфлацијата се зголеми за 0,4 проценти на месечна основа, што е највисоко од почетокот на годината.
Тоа ја донесе годишната стапка на инфлација на 2,9 проценти, што е зголемување за 0,2 процентни поени во однос на претходниот месец и е највисока од јануари. Економистите анкетирани од Dow Jones очекуваа зголемување на цените од 0,3 проценти на месечна основа и 2,9 отсто на годишна основа.
Извештајот беше придружен со не многу кротки податоци за невработеноста, која скокна на највисоко ниво за речиси четири години, поттикнувајќи облози дека креаторите на политиките следната недела ќе ги намалат каматните стапки за да се борат против брзото забавување на пазарот на трудот.
Како ќе дејствува Фед?
Членовите на Фед веруваат дека основниот индекс е подобар показател за долгорочните трендови на цените, додека целната инфлација на централната банка останува на два отсто.
Пазарите проценуваат дека Фед ќе ја намали својата референтна каматна стапка, која моментално е меѓу 4,25 и 4,5 проценти. Сепак, останува прашањето колку ќе биде големо следното намалување. Фед може да отстапи од вообичаеното намалување на стапката од четвртина процентен поен и овој пат да ги намали стапките за половина процентен поен. Причини за евентуално такво поголемо намалување се слабоста на пазарот на трудот и ниската инфлација, според „Си-ен-би-си“ (CNBC).
„Јасно е дека инфлацијата е релативно придушена, што дава флексибилност Фед да се фокусира повеќе на справување со моменталната слабост на пазарот на трудот“, изјави за „Блумберг“ Скајлер Вајнанд од „Реган капитал“ (Regan Capital). „Очекуваме Федералните резерви да ги намалат стапките за 25 базични поени, а потоа да следуваат уште две исто толкави намалувања годинава.“
Забавувањето на пазарот на трудот ги поттикна шпекулациите за поагресивно олабавување на политиката. Претседателот на Федералните резерви, Џером Пауел, минатиот месец претпазливо ја отвори вратата за намалување на симпозиумот на Фед во Џексон Хоул, а неодамнешните податоци покажаа дека забавувањето на вработувањето продолжило и во август, пишува „Блумберг“.
„Податоците за барањата за невработеност веројатно беа поважната вест“, изјави Тифани Вајлдинг од „Пацифик инвестмент менаџмент“ (Pacific Investment Management) за „Блумберг“. „Сè уште очекуваме Федералните резерви да ги намалат стапките за 25 базични поени - иако веројатно ќе се дискутира за 50 базични поени - а вкупното намалување годинава да биде 75 базични поени.“ За првпат по долго време податоците за инфлацијата се засенети од податоците за барањата за невработеност, предупреди Џош Џамнер од „Клирбриџ инвестментс“ (ClearBridge Investments).
Развој на глобалните пазари
Да ги погледнеме берзите низ целиот свет: индексот S&P постави рекорд минатата недела и во петокот заврши за 0,05 проценти пониско во споредба со претходниот ден, а за 1,59 проценти повисоко на неделно ниво. Индексот Nasdaq доби 0,44 проценти на дневна основа, односно повеќе од два отсто на неделно ниво. Dow Jones, пак, порасна за 0,59 проценти на дневна основа и остана во зелената зона на неделно ниво (+0,95 проценти).
Ветеранот стратег за пазари Ед Јардени ја зголеми својата прогноза за крајот на годината за индексот S&P 500 на 6.800 од претходните 6.600 поени, но рече дека има 25 проценти шанси индексот да достигне 7.000 до крајот на 2025 година.
Состојбата на другите берзи
На берзата во Јапонија имаше прослава, каде што премиерот Шигеру Ишиба пред нешто повеќе од една недела ја објави својата оставка. Неговата одлука беше поздравена од јапонските пазари, при што индексот Nikkei 225 порасна за околу три отсто. Јапонските акции пораснаа поради послабиот јен и можното зголемување на владините стимулации.
Кинескиот индекс CSI 300 порасна за 1,23 проценти, а индексот Hang Seng во Хонгконг порасна за 3,73 отсто.
ЕЦБ на пауза
Управниот совет на ЕЦБ во четвртокот одлучи да ги задржи непроменети трите клучни каматни стапки. Каматните стапки на банкарските депозити остануваат на два отсто, а на главните операции за рефинансирање и маргиналниот кредитен систем на 2,15 проценти и 2,4 проценти, соодветно.
Инфлацијата моментално се движи околу среднорочната цел од два отсто, а процената на Управниот совет за прогнозите за инфлацијата во голема мера е непроменета, соопшти ЕЦБ. Новите прогнози на надлежните од ЕЦБ покажуваат слична слика за инфлацијата како и во јунската прогноза. Тие предвидуваат дека инфлацијата ќе изнесува во просек 2,1 отсто во 2025 година, 1,7 во 2026 и 1,9 отсто во 2027 година.
„Управниот совет е решен да обезбеди стабилизирање на инфлацијата на среден рок на целта од два отсто. Ќе следува пристап базиран на податоци за утврдување на соодветната позиција на монетарната политика, за која ќе се одлучува на поединечни состаноци“, соопшти ЕЦБ.
Прогноза: Намалување на каматната стапка на крајот на декември.
Европските државни обврзници се претпочитаат во однос на акциите: потребните приноси се на рекордно високо ниво
Пред нешто повеќе од една недела трошоците за позајмување на Велика Британија достигнаа 5,75 проценти, што е највисоко ниво од 1998 година, додека француските каматни стапки се највисоки од 2011 година.
Инвеститорите се насочија кон долгорочни обврзници издадени од големите европски земји, кои се привлечни поради приносите што не се видени со децении. Долгорочните државни хартии од вредност од земји како Велика Британија и Франција инвеститорите ги сметаат за попривлечна опција од акциите, американските обврзници и валутите бидејќи тие обезбедуваат ретка рамнотежа меѓу повисоките приноси и фискалната рамка што е многу помалку ризична од САД.
Фокус на Франција и на Велика Британија.
ОПЕК+ го зголемува производството, рекордниот суфицит на нафта продолжува да расте
Меѓународната агенција за енергија соопшти дека се чини дека прогнозата за рекордниот суфицит од нафта за следната година уште повеќе ќе се зголеми бидејќи ОПЕК+ продолжува да го обновува производството, исто како што и конкурентите на групата го зголемуваат производството.
Иако Меѓународната агенција за енергија малку ги зголеми своите процени за глобалната побарувачка на нафта за оваа и следната година, таа уште повеќе ја зголеми својата прогноза за производство. Глобалното производство во 2026 година ќе ја надмине потрошувачката во просек за 3,33 милиони барели дневно, или околу 360.000 барели повеќе отколку што беше предвидено пред еден месец, се наведува во извештајот. Ова е историски суфицит на годишна основа, иако суфицитот беше дури и малку поголем за време на пандемијата во 2020 година.
Што ќе следиме неделава?
Понеделник, 15 септември
- Кина ќе објави податоци за малопродажбата, индустриското производство и пазарот на недвижности.
- „Евростат“ ќе објави податоци за надворешната трговија.
- Државниот завод за статистика (ДЗС) ќе објави индекси за прометот во услугите во вториот квартал.
Вторник, 16 септември
- „Евростат“ ќе објави податоци за индустриското производство.
- Германија ќе објави анкета за економското расположение.
- Во Италија ќе бидат објавени податоци за инфлацијата.
- Обединетото Кралство ќе објави податоци за невработеноста.
- САД ќе објават податоци за малопродажбата и индустриското производство.
- ДЗС ќе објави индекси за прометот во индустријата во јули и индекси на цените во земјоделството во август.
Среда, 17 септември
- Федералните резерви на САД ќе донесат одлука за каматните стапки.
- Банката на Канада исто така ќе одлучи за каматните стапки.
- „Евростат“ ќе објави податоци за инфлацијата.
- ЕЦБ ќе објави статистика за следење на платите.
- Јапонија ќе објави податоци за надворешната трговија.
- Претседателот Трамп ќе го посети Обединетото Кралство, а во негова придружба ќе бидат и претставници на водечките технолошки компании како што се „Енвидија“ и „Опен еј-ај“.
- Во Франкфурт ќе се одржи десеттата по ред истражувачка конференција на ЕЦБ, на која ќе зборува претседателката Лагард.
- Краен рок за спроведување на забраната за Тикток во САД.
Четврток, 18 септември
- Банката на Англија ќе одлучи за каматните стапки.
Петок, 19 септември
- Банката на Јапонија ќе одлучи за каматните стапки.
- Јапонија ќе објави податоци за инфлацијата.
.webp){kind=icon}
