ОПЕК+ враќа уште нафта на пазарот, резервите растат

ОПЕК+ се согласи да го забрза враќањето на уште еден дел од нафтата што ја задржуваше надвор од пазарот, додека групата останува на стратегијата да ѝ дава предност на пазарната квота наместо на цените.

На виртуелен месечен состанок што траеше само 11 минути, клучните членки на алијансата одобрија враќање на 137.000 барели дневно од октомври. Тоа претставува прв дел од поголема транша од 1,65 милиони барели дневно, која требаше да остане задржана до крајот на следната година, што укажува на претпазлив оптимизам во врска со пазарот.

Организацијата на земјите извознички на нафта и нејзините партнери ги изненадија нафтените пазари во изминатите месеци со повторно враќање на 2,2 милиони барели стопирано производство една година пред планираното, во обид да ја повратат пазарната квота, и покрај широко распространетите очекувања за претстојна презаситеност. Тоа враќање штотуку заврши, а не предизвика пад на цените или зголемување на резервите на Запад, каде се наоѓаат клучните светски репери за цената на нафтата.

ОПЕК+ во соопштение наведе дека постепено ќе ги врати целосно или делумно тие 1,65 милиони барели, без да даде конкретен рок или чекори. Организацијата потенцираше дека враќањето ќе зависи од пазарните услови — и дека, доколку биде потребно, може дури и да паузира или да ги повлече претходните зголемувања. Делегати неофицијално објаснија дека снабдувањето ќе се додава во месечни фази до септември следната година. Следниот состанок ќе биде на 5 октомври.

Цените на суровата нафта паднаа за 12 отсто оваа година, под притисок од зголеменото производство на земјите членки на ОПЕК+ и други извори, како и поради трговската војна што американскиот претседател Доналд Трамп ја води, а која ја намалува побарувачката. Сепак, пазарот се покажа изненадувачки отпорен на промената во стратегијата на алијансата, што ѝ даде дополнителна самодоверба на Саудиска Арабија и нејзините сојузници да вратат уште повеќе барели.

Еден делегат рече дека групата се надева дека зголемувањето на обемот на продажба ќе го надомести евентуалниот удар врз приходите поради пониските цени — сигнализирајќи промена на стратегијата што ОПЕК+ ја следеше речиси една деценија.

Bloomberg

Дополнителните зголемувања на производството веројатно ќе му одговараат на Трамп, кој повеќепати повика на пониски цени на нафтата за да се ублажи инфлацијата, а истовремено врши притисок врз Русија да ја прекине војната против Украина. Престолонаследникот на Саудиска Арабија, Мохамед бин Салман, треба да го посети Вашингтон во ноември за средба со американскиот претседател.

Помал обем

Сепак, реалниот обем најверојатно ќе биде помал од најавениот, бидејќи некои членки на групата се под притисок да компензираат за претходното преголемо производство и да се откажат од својот дел од зголемувањата, додека неколку земји немаат доволен капацитет.

Одлуката веројатно ќе го насочи вниманието кон неискористеното производство на различните членки на ОПЕК+, бидејќи земјите што не можат да пумпаат повеќе нема целосно да имаат корист од зголемените квоти, а ќе се соочат со дополнителен притисок од пониски цени.

Одлуката доаѓа во време на се поголеми предупредувања дека пазарот на нафта се движи кон значителен вишок на понуда, со завршувањето на летната сезона на возење во северната хемисфера.

Меѓународната агенција за енергија во Париз предвидува рекорден вишок на понуда следната година, поради ослабената потрошувачка во Кина, која со децении беше мотор на растот на побарувачката, и растечкото производство во Америка — од САД и Канада до Бразил и Гвајана. „Голдман Сакс“ предвидува дека Брент може да падне до ниските 50 долари за барел во 2026 година.

Пред оваа најнова одлука, ОПЕК+ веќе се согласи да врати 2,2 милиони барели дневно во серија забрзани зголемувања меѓу април и септември — една година порано од првично планираното.

Официјалните лица од групата претходно понудија низа објаснувања за отворањето на вентилите — од обид да се дисциплинираат земји што произведуваат повеќе, како Казахстан, до задоволување на барањата на Трамп за пониски цени и враќање на обемите на продажба што им биле препуштени на конкуренти како американските производители на нафта од шкрилци.

На подолг рок, потегот на ОПЕК+ ја ослабува долготрајната сигурносна мрежа од неискористени капацитети кои можеа да се вратат на пазарот за да ги амортизираат непредвидените шокови во снабдувањето.

Одлуката во неделата претставува уште еден неочекуван потег од саудискиот министер за енергетика, принцот Абдулазиз бин Салман, кој има историја на изненадувачки потези со кои сака да ги изигра шпекулантите.

На почетокот на неделата, мнозинството трговци со сурова нафта и аналитичари анкетирани од „Блумберг Њуз“ предвидуваа дека осумте клучни земји на ОПЕК+ ќе го задржат производството на исто ниво на неделниот состанок, пред да излезат информации дека групата ќе разгледува зголемување.