Пад на цената на нафтата додека трговците ги проценуваат ризиците за снабдувањето

Цената на нафтата падна по четиридневен раст, додека инвеститорите чекаа појасни сигнали за снабдувањето, а наедно ги следеа и пошироките пазарни потреси предизвикани од потегот на претседателот Доналд Трамп да разреши гувернер на Федералните резерви.

Брентот се спушти кон 68 долари за барел, а вест тексас интермидиејт (ВТИ) падна под 65 долари. Министерството за внатрешна безбедност на САД во понеделникот издаде соопштение дека ќе ги удвои царините на сиот индиски увоз за да ја казни земјата поради купување руска сурова нафта.

Мерката што треба да стапи во сила в среда е дел од поширок напор на Трамп да посредува за мир меѓу Русија и Украина. Сепак, рафинериите во јужноазиската земја планираат во наредните недели да го задржат најголемиот дел од набавките од Москва.

 

Нафтата благо опаѓа по четиридневен раст
Американските царини за Индија и намалениот интерес за ризик во фокусот

Bloomberg

„Доколку САД продолжат со удвојување на царините за Индија, пазарот повторно ќе ги доведе во прашање руските текови и може да видиме краткорочно враќање кон 70 долари“, изјави Роберт Рени, раководител за истражување стоки и јаглерод во „Вестпак банкинг“ (Westpac Banking Corp). Тој додаде дека пазарот исто така е фокусиран на неодамнешниот бран украински напади врз руската енергетска инфраструктура.

На пошироките пазари акциите паднаа, а златото порасна откако Трамп се обиде да ја разреши гувернерката на Фед Лиза Кук, што отвори грижи околу независноста на американската централна банка.

Суровата нафта во најголем дел од август се тргуваше во тесен опсег, додека трговците го проценуваа ефектот од американските давачки, како и долгорочните последици од серијата големи зголемувања на понудата од ОПЕК+. Меѓународната агенција за енергија на почетокот на месецов предупреди дека глобалниот пазар на нафта е на пат кон рекорден вишок следната година, бидејќи растот на побарувачката забавува, а снабдувањето расте.

Во врска со плановите за царини, Трамп исто така најави дека би можел да воведе дополнителни давачки за трговските партнери на Русија или санкции насочени кон Москва доколку не се постигне напредок во договорот, предупредувајќи на „многу големи последици“ ако ништо не се случи во наредните недели. Индиската влада ги осуди таканаречените секундарни царини како неправедни.