Русија почна да увезува бензин од Индија по украинските напади врз рафинериите

Русија почна да увезува бензин дури од Индија, бидејќи украинските напади врз нејзините рафинерии предизвикуваат сериозен недостиг на домашниот пазар.

Ова е првпат Москва да увезува моторно гориво од оваа јужноазиска земја, покажуваат податоците на „Кплер“ (Kpler), а потребата бензинот да помине толку долг пат укажува на тоа колку сериозна станува кризата.

Првата пратка била примена на 5 август, а можно е да пристигнат и други, според „Кплер“. Индиската преработувачка компанија „Најара енерџи“ (Nayara Energy Ltd.), поддржана од „Роснефт“ (Rosneft PJSC), најголемиот руски производител на нафта, стана извор на горивото, кое се транспортира преку синџир од руски поврзани танкери, со претовар во близина на Египет.

„Појавата на индиските количества е особено значајна“, изјави Сумит Ритолија, главен аналитичар во „Кплер“. Овие пратки, кои го дополнуваат континуираниот увоз од Белорусија и од другите соседни пазари, ја нагласуваат „сериозноста на сегашната нерамнотежа во снабдувањето со бензин на домашниот пазар и степенот до кој намалената работа на рафинериите ги менува традиционалните руски текови во трговијата со нафтени деривати“, рече тој.

Bloomberg

Глобалниот енергетски пазар се справува со последиците од два големи конфликта, додека Киев продолжува со нападите врз руските рафинерии, а САД и Иран и натаму се соочуваат на Блискиот Исток. Комбинираните нарушувања доведоа до затегнување на пазарите на горива, при што Москва, која традиционално е снабдувач на горива за странските пазари, го забрани извозот и на бензин и на дизел за да им даде приоритет на домашните потрошувачи.

По бранот напади, „ЕА аналитикс“ (EA Analytics) процени дека стапката на преработка на сурова нафта во Русија во јули изнесувала 3,6 милиони барели дневно, што е околу една третина под сезонскиот просек. Оттогаш Киев ги засили нападите, погодувајќи пет преработувачки постројки минатата недела и најмалку уште две оваа недела.

Руското Министерство за енергетика, индиското Министерство за нафта и тимот за комуникации на „Најара“ не одговорија на барањата на „Блумберг“ за коментар.

Откако Европската Унија воведе санкции против „Најара“ во јули минатата година, компанијата се потпира на таканаречени танкери од темната флота и операции за претовар за да ја прима суровата нафта и да извезува горива. Нејзината рафинерија во Вадинар, на западниот брег на Индија, со капацитет од 400.000 барели дневно, исто така треба да го прошири својот извозен пазар, откако еден од клучните купувачи, „Хиндустан петролеум“ (Hindustan Petroleum Corp.), неодамна почна да произведува повеќе сопствено гориво во регионот.

За првата пратка, танкерот за нафтени деривати „Сајклон“ (Cyclone), кој плови под руско знаме и порано се викал „Агни“ (Agni), натоварил 42.000 тони бензин во Вадинар на 18 јуни, покажуваат податоците за следење бродови што ги собра „Блумберг“. Горивото потоа било претоварено на танкерот „Гарнет“ (Garnet), кој плови под знамето на Оман, во пристаништето Дамиета, на медитеранскиот брег на Египет, на 6 јули. Тој брод потоа пристигнал во Русија на почетокот на август.

Можно е да следуваат уште пратки бензин. Танкерот за нафтени деривати „Варг“ (Varg) натоварил речиси 40.000 тони гориво во Вадинар на 6 јули и веројатно извршил претовар од брод на брод во Дамиета кон крајот на јули, врз основа на промените во неговиот газ, според „Кплер“. Претоварите од брод на брод, познати како СТС, обично се вршат за поединечните бродови да го скратат времето на патување.

Не е потврдено кој брод го презел товарот, иако „Кплер“ го посочи „Бист“ (Beast) како една од можностите. Бродот се наоѓал во Дамиета и на 30 и 31 јули било забележано зголемување на неговиот газ. „Бист“ го навел Танжер во Мароко како дестинација, но оттогаш го поминал тоа пристаниште и сега плови кон север во Атлантскиот Океан, со товарот сè уште на бродот, покажуваат податоците.

Друг танкер за нафтени деривати, „Фотон“ (Photon), кој плови под знамето на Камерун, исто така го напуштил Вадинар на 13 јули, пред да го претовари својот товар со бензин во Дамиета на танкерот „Талисман“ (Talisman), кој плови под руско знаме, на 28 и 29 јули, покажуваат податоците.

Сите овие бродови, со исклучок на „Гарнет“, биле класифицирани во рускиот регистар. Сите се под санкции на ЕУ, а „Гарнет“ и „Талисман“ се и под санкции на САД.

„Конечната дестинација на 'Талисман' и 'Бист' останува непотврдена, но новиот образец на трговија укажува дека центарот за претовар од брод на брод во Дамиета и натаму овозможува транспорт на бензин од Индија кон Русија“, соопшти „Кплер“ во извештај.