ОПЕК+ ги остава трговците во неизвесност по завршувањето на бурната фаза

ОПЕК+ во неделата стави точка на двегодишната етапа од својата нафтена стратегија со последното од серијата големи зголемувања на производството. Но на трговците со сурова нафта им остави неизвесност

Саудиска Арабија и нејзините партнери ги изненадија нафтените пазари и ги ограничија фјучерсите на цените во изминатите месеци со зголемено производство на барели во кревкиот глобален пазар, нудејќи олеснување за потрошувачите и политички поен за претседателот Доналд Трамп.

Зголемувањето на производството од 547.000 барели дневно, кое го одобрија во неделата, го комплетира укинувањето на големото намалување на понудата направено во 2023 година, една година пред планираното. Организацијата на земјите извознички на нафта и нејзините сојузници го забрзаа враќањето на количествата во обид да си го повратат уделот на пазарот.

И покрај тоа, тие сè уште имаат недовршена работа: дополнително количество нафта, исто така запрена пред две години, во износ од 1,66 милион барели дневно, која, според тековниот план, треба да остане надвор од пазарот до крајот на 2026 година. А во неделата делегатите понудија помалку, наместо повеќе, јаснотии за нејзината иднина.

Во зависност од условите на нафтениот пазар, коалицијата би можела да продолжи со активирање на оваа транша, изјавија официјални лица. Или, како што сугерираа некои делегати минатиот месец, производителите би можеле да направат пауза. Алтернативно, ако пазарите ослабнат, би можеле дури и целосно да ја поништат неодамнешната одлука. За 7 септември е закажан следниот состанок за преглед на ситуацијата.

Првичната реакција на пазарот на најновото зголемување на понудата беше воздржана, при што цената на нафтата брент во раното азиско тргување во понеделникот падна за само 0,4 отсто, на 69,38 долари за барел.

„Пораката што произлегува од денешната средба на доброволните производители е дека сите опции се на маса, вклучувајќи и враќање на овие барели, паузирање со зголемувањата засега или дури и укинување на неодамнешната одлука“, рече Хелима Крофт, директорка за стратешки анализи на комодитети во „РБЦ Капитал маркетс“ (RBC Capital Markets LLC).

Според проекциите за наредните месеци, ОПЕК+ можеби навистина ќе треба да размисли за намалување на производството.

Според процените на Меѓународната агенција за енергија во Париз, светскиот пазар се движи кон вишок од 2 милиони барели дневно во четвртиот квартал, поради очекуваното економско забавување во Кина и растечката понуда од Северна и Јужна Америка, и покрај досегашната стабилна побарувачка за нафта.

Слабите економски податоци од САД објавени во петокот ги потенцираа ризиците по потрошувачката поради тарифите на Трамп.

Прогнозери како „Голдман Сакс“ (Goldman Sachs Group Inc.)  и „ЏП Морган“ (JPMorgan Chase & Co.) очекуваат цените на фјучерсите за сурова нафта, кои веќе паднаа за 6,7 отсто годинава и се блиску до 70 долари за барел во Лондон, дополнително да се спуштат кон 60 долари до крајот на годината. Тоа е значително пониско од нивото потребно на Саудијците и другите членки на ОПЕК+ за покривање на државните трошења.

„Голдман“ очекува дека коалицијата најверојатно ќе направи пауза и ќе го задржи производството стабилно некое време, додека ја анализира рамнотежата помеѓу понудата и побарувачката. Пет трговци со сурова нафта анкетирани од „Блумберг“ минатата недела исто така предвидуваат застој.

Од друга страна, ако Ријад навистина е посветен на стратегијата за освојување пазарен удел, како што тврдат упатени во нивното размислување, треба да ги игнорира тие прогнози и да продолжи со активирање на траншата од 1,66 милион барели без оглед на сѐ.

„Можеме да очекуваме групата да примени стратегија на чекање и набљудување барем во првите неколку месеци“, изјави Грег Бру, виш аналитичар во „Евроазија груп“ (Eurasia Group). „Но, ако дојде до намалување на понудата од САД, а растот на побарувачката и макроекономската слика останат поволни, мислам дека може да се очекува понатамошно укинување на намалувањата“.

Перспективата е дополнително заматена од геополитичкиот контекст, бидејќи Трамп ја засилува дипломатската офанзива врз колидерот на ОПЕК+, Русија, во врска со нејзината војна против Украина.

Американскиот претседател се закани дека ќе воведе секундарни тарифи за купувачите на руска нафта, освен ако брзо не се постигне прекин на огнот во конфликтот.

Во четвртокот заменик-премиерот на Русија, Александар Новак, оствари ретка посета на Ријад за разговори со саудискиот министер за енергетика, принцот Абдулазиз бин Салман, средба за која официјални претставници изјавија дека ја симболизира солидарноста меѓу двата нафтени гиганта.

Додека ОПЕК+ се обидува да ги избалансира притисокот од Трамп за пониски цени, од една страна, и желбата да ја зачува кохезијата на алијансата, од друга страна, каква и да биде конечната одлука, ќе бара вешта рамнотежа.

„Ќе се реши ли групата да ја укине преостанатата транша од 1,66 милион барели дневно за да го одбрани пазарниот удел, особено ако новите американски санкции ја погодат руската нафта, без да се загрози единството“, прашува Хорхе Леон, аналитичар во „Ристад енерџи“ (Rystad Energy A/S ), кој претходно работел во секретаријатот на ОПЕК.

„Групата сè уште оди по тенка линија“.

Во моментов нема коментари за веста. Биди прв да коментира...

Остави коментар