Руската нафта држи цена и покрај притисокот од ЕУ

Руската нафта од типот Урал моментално се продава со најмала разлика во цената во однос на референтните пазарни цени од почетокот на војната во Украина во 2022 година, што укажува на тоа дека новите европски санкции досега не го даваат очекуваниот ефект.

Нафтата што се извезува од западните пристаништа на Русија последниве денови се продавала со просечен „попуст“ од 11,45 долари по барел во однос на референтната цена на нафтата од типот Брент од Северното море, според податоците на компанијата „Аргус медија“ собрани од „Блумберг“. Тоа е најмалиот забележан јаз уште од февруари 2022 година, кога Русија ја започна целосната инвазија врз Украина.

 

Попустот се намалил и покрај тоа што Европската унија (ЕУ) овој месец најави нов пакет санкции што шефицата на дипломатијата на ЕУ, Каја Калас, го опиша како еден од најсилните. Со цел да се намали приливот на приходи од нафта во рускиот буџет, Брисел планира да ја ограничи максималната цена на руската нафта на 47,6 долари по барел (наместо досегашните 60 долари) и да забрани увоз на нафтени деривати произведени од руска нафта. Урал минатата недела се продаваше по цена повисока од 58 долари.

Азиската побарувачка и ограничената руска понуда веројатно придонесуваат за намалување на попустот, додека новите забрани на ЕУ сè уште не се стапени во сила.

„Помалиот попуст за руската нафта може да е резултат на стабилната побарувачка од Азија, особено од Кина, чии рафинерии речиси и не се изложени на европските санкции бидејќи не извезуваат многу на европскиот пазар“, рече Мују Сју, виша аналитичарка за сурова нафта од истражувачката фирма „Кплер“. „Исто така, купувачите на руската нафта помалку се грижат за европските санкции, за разлика од посериозните последици од американските ограничувања.“

Понудата на руската сурова нафта исто така останува релативно ограничена, бидејќи производството сè уште заостанува зад зголемените квоти поставени од страна на ОПЕК+, наведува Џовани Стауново, аналитичар за суровини од швајцарската банка УБС. „Тоа би можело да биде уште еден фактор што влијае на намалување на разликата во цената во однос на пазарниот просек“, рече тој.

Можеби сè уште е рано за процена на влијанието од 18-тиот пакет санкции на ЕУ против Москва. Новиот ценовен лимит треба да стапи на сила на 3 септември, додека забраната за увоз на нафтени деривати произведени од руска сурова нафта стапува на сила дури кон крајот на јануари следната година.

Сепак, Индија, која моментално е најголем увозник на руска нафта, веќе размислува за диверзификација на набавката, според тврдењата на аналитичари и претставници на рафинерии. Ако дел од индиските купувачи ја намалат побарувачката, преостанатите клиенти ќе добијат поголема преговарачка моќ за дополнителни попусти.

„Очекувам дека попустот повторно ќе се зголеми по 3 септември, но веројатно не многу, освен ако Европејците не најдат ефикасен начин за спроведување на санкциите“, изјави Роналд Смит од консултантската фирма „Емерџинг маркетс“. „Европа и САД имаат причина да не бидат премногу успешни во спроведувањето на санкциите: запирањето на рускиот извоз автоматски би довел до вртоглав пораст на цените на нафтата на светскиот пазар.“

Сепак, доколку се остварат прогнозите за вишок на нафта подоцна оваа година, тоа би можело да ги намали светските цени и дополнително да ја намали вредноста на Урал. Русија, чиј државен буџет во голема мера се потпира на нафтата и гасот, веќе се соочува со растечки буџетски дефицит бидејќи сегашната цена на нафтата е пониска од планираните 69,7 долари по барел, предвидени со буџетот за 2025 година.

Цената на Урал од пристаништето Приморск на Балтичко Море и Новоросијск на Црно Море, без вклучени трошоци за транспорт и осигурување, до товарење во пристаништето на испорака, изнесувала во просек 58,06 долари по барел во петокот, според податоците на „Аргус медија“ собрани од „Блумберг“.

Во моментов нема коментари за веста. Биди прв да коментира...

Остави коментар