Руските нафтени гиганти пријавија пад на приходите

Профитот на руските производители на нафта падна во првата половина од годинава, погоден од пониските цени на суровата нафта и зајакнувањето на рубљата. „Роснефт“ (Rosneft PJSC) пријави нето-приход од 245 милијарди рубли во првите шест месеци, што претставува пад од над 68 отсто во однос на истиот период во 2024 година. Намалувањето на профитот е последица и на падот на цените на нафтата поради американските и европските санкции, како и на посилниот курс на руската рубља.

„Првата половина од годинава беше обележана со пониски цени на нафтата, пред сè поради прекумерното производство“, изјави Игор Сечин, извршен директор на „Роснефт“. „Дополнително, дојде до зголемување на попустите на руската нафта поради заострувањето на санкциите од ЕУ и САД, како и значајното зајакнување на курсот на рубљата, што негативно влијаеше врз финансиските резултати на сите извозници“, додаде тој.

Падот на профитот доаѓа по послабите резултати и кај конкурентите на „Роснефт“. Минатата недела „Лукоил“ (Lukoil PJSC) и „Газпромнефт“ (Gazpromneft PJSC) пријавија пад на профитот во првата половина од годината за повеќе од 50 отсто во однос на претходната година. Помалиот пазарен играч „Татнефт“ (Tatneft PJSC) забележа пад на приходите од 62 отсто.

Поевтините глобални цени на суровата нафта го загрозија профитот на нафтените гиганти низ светот во првата половина од годинава, поради страв од глобален вишок нафта. ОПЕК+ (OPEC+) ја враќа намалената понуда на пазарот побрзо од очекуваното, додека американската тарифа на претседателот Доналд Трамп се заканува да ја забави глобалната економија.

Падот на нето-приходот на руските производители на нафта делумно е последица на западните санкции и ограничувања воведени за Русија, со цел да се ограничат нејзините можности за финансирање на војната во Украина.

Според пресметки на „Блумберг“ (Bloomberg) врз основа на податоци од „Аргус медија“ (Argus Media), уралсот (Urals), клучната извозна мешавина на Русија, во просек изнесуваше 58 долари за барел во првата половина од годинава, што е пад од над 13 отсто во однос на претходната година.

Рубљата до 30 јуни зајакна речиси 23 отсто, на 78,4685 за долар во однос на крајот на минатата година, додека клучната каматна стапка во Русија остана близу рекордно високото ниво.

Иако руската централна банка ги намали трошоците за задолжување за вкупно 300 базични поени на состаноците во јуни и јули, Сечин оценува дека темпото на намалување е „недоволно“.

„Една од последиците од одржувањето на клучната каматна стапка на покачено ниво во подолг временски период е прекумерното зајакнување на рубљата, што носи загуби и за рускиот буџет и за извозните компании“, додаде тој. „Исто така, тоа доведува до зголемување на трошоците за сервисирање на долгот, ја влошува финансиската стабилност на корпоративните заемоприматели и го нарушува инвестицискиот потенцијал“, нагласи Сечин.

Во моментов нема коментари за веста. Биди прв да коментира...

Остави коментар