Пад на цените на нафтата додека светот е фокусиран кон средбата Трамп – Зеленски

Цената на нафтата падна додека трговците го насочија вниманието кон денешната средбата меѓу Доналд Трамп и Володимир Зеленски, при што украинскиот лидер се соочува со американски притисок да постигне мировен договор со Русија што подразбира откажување од дел од територијата.

Брент се тргуваше под 66 долари за барел откако во претходната сесија затвори со пад од 1,5 отсто, додека американската сурова нафта Вест Тексас Интермедиет (WTI) се движеше под 63 долари. Како знак на поддршка, во Вашингтон на разговорите ќе се приклучат и европски лидери, меѓу кои претседателката на Европската комисија Урсула фон дер Лајен, францускиот претседател Емануел Макрон и генералниот секретар на НАТО, Марк Руте.

Американскиот претседател по разговорите со Владимир Путин во Алјаска во петокот изјави дека ќе го поттикне Зеленски брзо да постигне договор и даде сигнал дека е подготвен да ги разгледа барањата на рускиот лидер Украина да се откаже од големи делови територија.

Пред средбата со Путин, Трамп им кажал на сојузниците дека постигнувањето прекин на огнот ќе биде негово клучно барање и се заканил дека ќе ја напушти средбата и ќе воведе остри нови мерки против Москва и земјите што купуваат руска нафта доколку тоа не биде прифатено. Но, во петокот, американскиот претседател даде сигнал дека не брза со воведување санкции.

Досега, Трамп ја стави Индија на удар поради купување руска сурова нафта, воведувајќи високи тарифи. Сепак, во интервју за „Фокс њуз“ (Fox News) во петокот, тој рече дека ќе се воздржи од зголемување на давачките за кинеската стока, и покрај тоа што Кина исто така купува руска нафта.

Разговорите за изнаоѓање решение за војната во Украина внесоа неизвесност на пазарот и доведоа до тргување со нафтата во тесен опсег во последниот период. Сепак, фјучерсите годинава се намалени за повеќе од 10 отсто поради загриженоста околу последиците од трговските политики на Трамп и поради тоа што ОПЕК+ (OPEC+) брзо враќа на пазарот барели што претходно беа повлечени.

Минатата недела, Меѓународната агенција за енергија (International Energy Agency – IEA) соопшти дека пазарот е на пат да забележи рекорден вишок во 2026 година поради раст на понудата и забавена побарувачка.