Инфлацијата во еврозоната остана на посакуваните два отсто

Инфлацијата во еврозоната се задржа на целното ниво на Европската централна банка (ЕЦБ), што ги поддржува аргументите на официјалните лица, кои велат дека нема брзање за натамошно намалување на каматните стапки.

Потрошувачките цени се зголемија за два отсто на годишно ниво во јули, исто темпо како и во претходниот месец, соопшти денеска „Евростат“. Економистите анкетирани од „Блумберг“ очекуваа забавување на 1,9 отсто.

Основната мерка, која ги исклучува нестабилните трошоци за енергија и храна, се зголеми за 2,3 отсто на годишно ниво, додека внимателно следената инфлација на услугите беше најслаба од почетокот на 2022 година.

Bloomberg Mercury

 

Извештајот нагласува дека ценовниот шок што започна за време на пандемијата продолжува да бледнее. ЕЦБ е уверена дека инфлацијата во голема мера е скротена и ги намали стапките осум пати во период од една година, до тој степен што се смета дека ниту го ограничуваат ниту го стимулираат растот.

Со инфлација што се движи околу целта и економија што досега се држи од притисокот на американските царини, многу креатори на политиките сигнализираа дека не гледаат силни причини за продолжување на кампањата за олабавување од страна на ЕЦБ. Инвеститорите исто така гледаат помалку од 50 проценти шанси за уште еден таков потег годинава.

Bloomberg Mercury

 

„Дојдовме до точка во нашиот циклус на олабавување каде што можеме да почекаме и да видиме дали податоците и доказите укажуваат на потреба од промена во нашиот став за монетарната политика“, изјави неделава шефот на ирската централна банка Габриел Маклуф.

Мешаните национални извештаи веројатно нема да го променат тој став. Додека растот на цените во Германија минатиот месец забави посилно од очекуваното, бројките од Франција, Италија и Шпанија беа малку повисоки од очекуваното.

Трговската политика на американскиот претседател Доналд Трамп долго време беше клучен прашалник за економските перспективи. Но неговиот неодамнешен договор со Европската Унија, кој предвидува царини од 15 проценти за повеќето производи што се увезуваат од блокот, го отстрани ризикот од краткорочна ескалација, а наедно им обезбеди поголема јасност на компаниите.

Bloomberg Mercury

 

Растот во еврозоната забави во вториот квартал, по поголемата активност на почетокот на годината, кога фирмите брзаа поради најавите за царини на Трамп во април. Производството сепак порасна за 0,1 отсто во трите месеци до јуни, а некои економисти посочија на докази за закрепнување на домашната побарувачка.

Иако ЕЦБ предвидува дека инфлацијата ќе почне да паѓа под целта во овој квартал, официјалните лица се уверени дека таа ќе се врати на два отсто во 2027 година бидејќи повисоките владини трошоци за инфраструктура и одбрана ја поддржуваат економијата.

Гувернерот на Банката на Франција, Франсоа Вилерој де Гало, сепак ги повика колегите да останат „целосно отворени“ за следните чекори, предупредувајќи дека зајакнувањето на еврото би можело да има дезинфлаторни ефекти. Аналитичарите во Банката на Америка се согласуваат дека девизниот курс би можел да биде еден од факторите што водат до понатамошни намалувања.

Еврото, кое се искачи над 1,18 долар на почетокот на минатиот месец, оттогаш изгуби повеќе од три отсто и се задржа на околу 1,14 долар пред објавувањето на податоците за инфлацијата.

 

Во моментов нема коментари за веста. Биди прв да коментира...

Остави коментар