Десетте најбогати луѓе остварија рекордна добивка по победата на Трамп

Богатството на десетте најбогати луѓе во светот се зголеми со дневен рекорд откако Доналд Трамп освои втор претседателски мандат.

Нето-богатството на милијардерите предводени од Илон Маск од „Тесла“ (Tesla Inc.), најбогатиот човек на светот, се зголеми за 63,5 милијарди долари во средата, според индексот на милијардери на „Блумберг“. Само Маск додаде 26,5 милијарди долари на своето конто. Џеф Безос од „Амазон“ (Amazon.com Inc.) и Лери Елисон од „Оркл“ (Oracle Corp.) беа исто така меѓу најголемите добитници. Тоа е највисокото дневно зголемување од почетокот на водењето на индексот на богатството на „Блумберг“ во 2012 година.

Bloomberg

Голем дел од придобивките за ултрабогатите се сведува на порастот на акциите во САД, што ги нагласува облозите дека Трамп, по неговото враќање во Белата куќа, ќе спроведе агенда за фаворизирање пониски даноци и помала регулатива. S&P 500 скокна за 2,5 отсто во најдоброто постизборно остварување во историјата, додека американскиот долар исто така порасна.

Само еден од првите десет најбогати во светот се наоѓа надвор од САД; Бернард Арно, претседател на ЛВМХ (LVMH).

Маск, кој водеше кампања заедно со новоизбраниот претседател, е подготвен да влијае на политиката бидејќи Трамп вети дека ќе му даде официјална улога. Акциите на „Тесла“ во Њујорк се зголемија за 15 отсто во средата, зголемувајќи ги добивките во текот на минатата година на 32 отсто.

Освен Маск, други најголеми добитници се криптомилијардерите. Брајан Армстронг, коосновач и извршен директор на криптоберзата „Коинбејс“ (Coinbase Global Inc), забележа дека неговата нето-вредност се искачи за 30 отсто, на 11 милијарди долари. Чангпенг Жао, основач на „Бајненс“ (Binance), најголемата светска криптоберза, додаде 12,1 милијарди долари по изборите, зголемувајќи ја неговата нето-вредност на 52,7 милијарди долари.