.webp){kind=icon}
На децата под 16 години во Австралија ќе им биде забрането да користат социјални мрежи, како дел од напорите за заштита на менталното здравје на младите, изјави премиерот Ентони Албанез, со што фирмите ќе бидат обврзани да ги спроведуваат новите регулативи или да се соочат со потенцијални казни.
„Социјалните мрежи им штетат на нашите деца и јас му ставам крај на тоа“, изјави Албанез пред новинарите во Канбера во четвртокот, ветувајќи дека ќе воведе легислатива во текот на месецов. „Одговорноста ќе биде на платформите за социјални мрежи да покажат дека преземаат разумни чекори за да го спречат пристапот. Одговорноста нема да биде на родителите или на младите. Нема да има казни за корисниците“.
Долгоочекуваните ограничувања во однос на возраста за социјалните мрежи се дел од пакетот мерки на централнолевичарската влада на Албанез за да се справи со технолошките гиганти, кои премиерот ги обвинува за порастот на дезинформациите и на проблемите со менталното здравје.
Австралија има историја на соочувања со големите технолошки компании што управуваат со социјалните мрежи, вклучувајќи го и напорот во 2021 година да ги натера Фејсбук и Гугл да плаќаат за новински содржини. Поскоро, владата го тужеше X на Илон Маск поради неуспехот да отстрани видео од терористички напад во Сиднеј.
Лабуристите исто така разгледуваат ново законодавство за да ги принудат социјалните мрежи да се справат со дезинформации и лажни вести на нивните платформи.
Владата изјави дека се консултирала со компаниите за социјални мрежи за возрасните ограничувања „преку различни средства“. Сепак, официјалните лица не прецизираа на кои услуги ќе се применуваат промените, дали добиле уверувања дека забраната може да се спроведе или каква ќе биде потенцијалната големина на казните за компаниите.
„Мета“ ги почитува „сите возрасни ограничувања што владата сака да ги воведе за користење на социјалните мрежи“, според Антигона Дејвис, шефица за безбедност на компанијата. Истражувањата покажаа дека родителите сакаат да бидат вклучени во онлајн животот на нивните тинејџери и сакаат да имаат збор во одлучувањето што е соодветно за нив, рече таа.
„Она што недостига е подлабока дискусија за тоа како да се спроведе заштитата, инаку ризикуваме да се чувствуваме подобро, како да сме презеле акција, но тинејџерите и родителите нема да се најдат во подобра позиција“, наведе Дејвис во изјавата.
Портпаролот на Тикток во Австралија одби да коментира. „Гугл“ и X не одговорија веднаш на барањата за коментар.
Албанез рече дека не верува дека законите ќе бидат целосно ефективни или дека ќе го решат проблемот веднаш, посочувајќи на ограничувањата за алкохол што не успеаја да го спречат пиењето кај малолетниците.
