Велика Британија ќе ги забрани социјалните мрежи за деца под 16 години

Британскиот премиер Кир Стармер најави дека Владата ќе воведе забрана за користење на социјални мрежи за лица помлади од 16 години, како и нови ограничувања за гејминг и платформите за пренос во живо. Станува збор за едни од најстрогите онлајн регулативи во светот досега.

Стармер истакна дека целта на мерките е заштита на децата на интернет и намалување на влијанието на големите технолошки компании. Според него, целосна забрана е „правилниот избор“, кој ќе ги промени навиките на децата и очекувањата на родителите, ќе придонесе за поголема безбедност и подобра благосостојба, како и повеќе време за здрав развој.

Планираната забрана би опфатила платформи како Тикток, Снепчет и Инстаграм, а мерките би се однесувале и на гејминг и стриминг услуги кои овозможуваат комуникација со непознати лица. Владата наведува дека постоечките закони веќе овозможуваат почетни чекори, а целосната регулатива би била воведена до крајот на годината, со примена од следната пролет.

Во последните години Велика Британија постепено ги заострува правилата кон технолошките компании, барајќи проверка на возраста, прилагодување на алгоритми и заштита од споделување на чувствителни содржини од малолетници.

Одлуката доаѓа по зголемена загриженост за влијанието на социјалните мрежи врз менталното здравје на децата, како и по анализа на искуствата од Австралија, која веќе воведе слична забрана за лица под 16 години.

Според владини податоци, мерките добиле широка поддршка во јавноста  - над 83 отсто од родителите сметаат дека ризиците од социјалните мрежи се поголеми од придобивките, додека 90 отсто ја поддржуваат минималната возраст од 16 години.

Иако дел од родителите и политичарите ја поддржуваат забраната, некои психолози и истражувачи предупредуваат дека нема доволно докази дека ваквата мерка ќе биде ефикасна, додека ставовите меѓу младите остануваат поделени.