Млад човек утринава со нож нападнал ученици и наставници во основното училиште „Пречко“ во Загреб. Едно дете загина, додека една наставничка е во животна опасност. Министерството за здравство потврди дека во нападот се повредени уште шест деца.
Напаѓачот се повредил и самиот, а хрватското МВР преку соопштение потврди дека станува збор за 19-годишен хрватски државјанин, кој нешто пред десет часот наутро со остар предмет повредил наставник и неколку ученици.
„Напаѓачот во моментов е под полициски надзор. На повредените им се укажува медицинска помош. Од добиените повреди едно дете починало“, се наведува во соопштението на надлежното министерство.
Давор Божиновиќ
MUP HR
На местото на настанот пристигнале градоначалникот на Загреб, Томислав Томашевиќ, неговиот заменик Лука Корлает и министерот за внатрешни работи Давор Божиновиќ.
Од Град Загреб истакнаа дека се потресени од страшниот настан и изразија сочувство до сите жртви и нивните семејства.
„Ова е голема трагедија за градот Загреб и за цела Хрватска. Градоначалникот и замениците се на местото на настанот. Во овој момент полицијата ги утврдува сите околности, сторителот е уапсен. Градот ќе помогне да им се обезбеди психолошка помош на учениците, родителите и вработените во училиштето. На надлежните државни органи им стојат на располагање сите служби на градот“, се наведува во соопштението на градската управа.
Премиерот Андреј Пленковиќ на почетокот на денешната седница на Владата се обрати до јавноста и се осврна на нападот во загрепското училиште.
„Згрозени сме, како и целата хрватска јавност, од големата трагедија што се случи утрово во основното училиште ’Пречко’ во Загреб“, изјави Пленковиќ, а пренесе „Дневник.хр“.
.webp){kind=icon}