Корпоративната заедница на почетокот на неделава ја потресе „спутник момент“, поточно новиот модел на вештачка интелигенција развиен од кинескиот „Дипсик“ (DeepSeek). Нивниот нов модел е 10 пати поевтин од услугите на „Опен еј-ај“ (OpenAI) и затоа претставува закана за американската доминација, но тоа е само еден од факторите.
ПОЛИТИКА
Трамп вети царини поголеми од 2,5 проценти
Американскиот претседател изјави дека сака да воведе сеопфатни царини, кои, според него, се многу поголеми од 2,5 проценти, колку што претходно најави новиот министер за финансии Скот Бесент.
„Имам на ум што ќе биде тоа, но сè уште нема да ги воведам. Тоа ќе биде доволно за да ја заштитиме нашата земја“, изјави Трамп пред новинарите за време на патувањето со претседателскиот авион „ер форс уан“ (Air Force One), при враќањето во Вашингтон од Флорида. Трамп претходно, на републиканската конференција во Мајами, вети царини за одредени сектори, вклучувајќи полупроводници, фармацевтски производи, но и челик, бакар и алуминиум. Тој исто така сугерираше дека би можел да воведе царини за автомобили од Канада и Мексико, односно од земјите на кои веќе им се закани со царини од 25 проценти.
ЕКОНОМИЈА
Најбогатите „осиромашија“ за 108 милијарди долари
Петстотини најбогати луѓе во светот, предводени од коосновачот на „Енвидија“ (Nvidia), Џенсен Хуанг, во вторникот изгубија вкупно 108 милијарди долари, бидејќи распродажбата на технолошките акции предизвика голем пад на водечките индекси. Масовната распродажба ја предизвика новиот модел на вештачка интелигенција развиен од кинеската стартап-компанија „Дипсик“. Тоа предизвика загриженост меѓу инвеститорите за одржливоста на американската доминација во секторот на вештачка интелигенција.
Да потсетиме, новиот модел развиен од „Дипсик“ само за неколку дена стана хит меѓу корисниците, доведувајќи ја во прашање оправданоста на високите вреднувања на компаниите што произведуваат опрема за центри за податоци поврзани со вештачка интелигенција, како „Енвидија“.
„Дипсик“„поставува сериозно прашање дали значајните капитални и оперативни трошоци на Силициумската Долина навистина се најдобриот начин за пристапување кон тенденциите за вештачка интелигенција“, изјави во понеделникот Ниргуна Тиручелвам, раководител на секторот за потрошувачи и интернет во „Алетија капитал“ (Aletheia Capital) од Сингапур. „Тоа ги доведува во прашање огромните износи на капитал вложени во вештачка интелигенција“, додаде тој. Повеќе за оваа тема дознајте на ЛИНКОТ.
БЕРЗИ
Европа
Фјучерсите на европските акции се тргуваат мешано. Потсетуваме, европските пазари го завршија тргувањето во понеделникот со загуби, бидејќи инвеститорите го анализираа потенцијалниот пробив на Кина во светот на вештачката интелигенција. Имено, кинескиот стартап „Дипсик“ ги потресе глобалните технолошки акции, откако таа компанија претстави јазичен модел на вештачка интелигенција наречен Р1 (R1), за кој тврди дека користи поевтини чипови и помалку податоци.
САД
И фјучерсите на американските индекси се тргуваат мешано, пред објавувањето на најновите податоци за довербата на потрошувачите. Технолошкиот индекс Nasdaq во вторникот ослабе дури три проценти, поради што неговата вредност падна за речиси билион долари во однос на петокот. Распродажбата ја предизвика загриженоста дека поевтиниот модел на вештачка интелигенција од Кина би можел да ја загрози американската доминација во секторот на вештачката интелигенција.
Азија
Кога станува збор за акциите во азиско-пацифичкиот регион, тие се претежно во црвено. Индексот MSCI падна дури 0,6 проценти, при што најголеми загуби регистрираа јапонските технолошки компании. Повеќето азиски пазари, вклучувајќи ги Кина, Јужна Кореја и Тајван, се затворени поради одбележувањето на лунарната Нова година.
.webp){kind=icon}
