Голема авионска несреќа се случи денеска во Вашингтон кога патнички авион со 60 патници и четворица членови на екипажот се урна во реката Потомак откако се судри со воен хеликоптер. Несреќата се случила околу 21 часот по локално време, а во меѓувреме се огласи и претседателот Доналд Трамп.
Тој на социјалната мрежа Трут (Truth Social) напиша дека несреќата „требало да биде спречена“.
Повикувајќи се на изјави од официјални лица, „Блумберг“ (Bloomberg) пишува дека околу 300 спасувачи бараат преживеани по инцидентот. Се чека официјално соопштение од градските челници за бројот на жртвите, а светските медиуми - вклучувајќи го и „Гардијан“ (Guardian) - јавуваат дека најмалку 30 тела се извлечени од водата.
Сè уште не е јасно дали има преживеани, но она што се знае е дека нуркачите и спасувачите работат во доста тешки услови. Темно е и студено, а иако реката во тој дел не е многу длабока, водата е матна и ледена, додава „Блумберг“.
Националниот аеродром „Роналд Реган“ ги суспендираше сите летови и ќе остане затворен до 11 часот в четврток по локално време.
Регионалниот авион на „Американ ерлајнс“ (American Airlines Group Inc), ЦРЈ700 (CRJ700), лет 5.342, полетал од Вичита, Канзас, и удрил во хеликоптер „блек хок“ (Sikorsky H-60 Black Hawk), во кој имало тројца воени лица. Локалните медиуми јавуваат дека во Вашингтон е формиран таканаречен центар за закрепнување, а „Ен-би-си“ (NBC) наведува дека има „некаков вид привремена мртовечница“ на хелиодромот на противпожарната служба.
Нема преживеани во несреќата, соопшти предмалку на прес-конференција шефот на пожарникарите во Вашингтон.
„Сега веќе не веруваме дека има преживеани во оваа несреќа“, изјави за медиумите Џон Донели.
На прес-конеренцијата беше речено дека имало комуникација помеѓу двете летала и контролната кула на авионот. Хеликоптерот „бил свесен дека има авион во близина“.
Ажурирано со изјавите од прес-конференцијата
.webp){kind=icon}
