Во Европа во средата францускиот премиер Франсоа Бајру преживеа две гласања за недоверба, додека американските сојузници очекуваат администрацијата на претседателот Доналд Трамп да претстави план за завршување на војната во Украина на Минхенската безбедносна конференција, која ќе се одржи следната недела во Германија.
ПОЛИТИКА
Француската влада преживеа гласање за недоверба
Бајру во средата преживеа две гласања за недоверба, со што се отвори патот за усвојување на буџетот за 2025 година по неколкумесечни политички превирања. Потсетуваме, Франсоа Бајру во понеделникот искористи посебна уставна одредба за да го протурка буџетот низ парламентот без гласање, што предизвика иницијатива за гласање за недоверба. Гласањето за недоверба го побара крајната левица, но беше осудено на неуспех, бидејќи крајната десна Национално обединување и социјалистите не ги поддржаа предлозите.
Подготвен е мировниот план на Трамп за Украина
Американските сојузници очекуваат администрацијата на Трамп да претстави план за завршување на војната во Украина на Минхенската безбедносна конференција, која ќе се одржи следната недела во Германија. Тоа го тврдат извори запознаени со ситуацијата. Нацртот на сојузниците ќе им го претстави специјалниот пратеник на Трамп за Украина и Русија, Кит Келог. Планот вклучува потенцијално замрзнување на конфликтот и оставање на териториите окупирани од Русија во нерешена состојба. Исто така, предвидува давање безбедносни гаранции на Украина, но не е прецизирано какви би биле тие.
Меѓународни осуди на предлогот на Трамп за Газа
Откако американскиот претседател Трамп го изнесе планот Америка да го преземе Појасот Газа, следуваа остри реакции низ светот. Истовремено, советниците на Трамп се обидоа да ја ублажат неговата идеја, наведувајќи дека станува збор за „великодушна понуда“ за обновување на Газа и дека Палестинците само привремено би се преместиле од таа територија. Иако идејата на Трамп наиде на жестоки осуди низ Блискиот Исток, па дури и меѓу најважните европски сојузници, Израел го поздрави неговиот предлог.
БЕРЗИ
Европа
Фјучерсите на европските акции се тргуваат мешано, пред објавувањето на податоците за малопродажбата во еврозоната, како и одлуката на Централната банка на Англија за каматната стапка. Се очекува Банката на Англија (БоЕ) да ги намали каматните стапки за четвртина процентен поен, на 4,5 отсто, што би било најниско ниво од јуни 2023 година.
САД
Истовремено, фјучерсите на американските индекси се тргуваат со добивки, пред објавувањето на најновите податоци од пазарот на трудот. Приносите на 10-годишните американски обврзници паднаа за девет базични поени, на 4,42 отсто, додека приносите на двегодишните обврзници паднаа за три базични поени. По ескалацијата на трговската војна меѓу Америка и Кина реагираа и официјалните лица на Фед.
Па така, претседателот на Федералните резерви во Чикаго предупреди дека упорните царини би можеле да предизвикаат нарушувања во синџирот на снабдување и да ја зголемат инфлацијата.
Азија
Кога станува збор за акциите во азиско-пацифичкиот регион, тие претежно се тргуваат со добивки. Акциите во Хонгконг и континентална Кина пораснаа, бришејќи ги вчерашните загуби.
.webp){kind=icon}