Украинските обврзници во долари продолжија да растат во средата, откако Трамп изјави дека разговарал со Путин. Обврзниците на таа земја имаа најдобри перформанси меѓу земјите во развој во средата, според податоците собрани од „Блумберг“ (Bloomberg).
ПОЛИТИКА
Како помина разговорот меѓу Трамп и Путин
Американскиот претседател Доналд Трамп изјави дека разговарал телефонски со рускиот претседател Владимир Путин и дека се договориле веднаш да започнат преговори за завршување на војната во Украина. Трамп напиша на социјалните мрежи дека имал „долг и многу продуктивен телефонски разговор“ со Путин и дека тимовите на двете земји веднаш ќе започнат преговори. Трамп подоцна им изјави на новинарите во Овалната соба на Белата куќа дека веројатно наскоро ќе се сретне со Путин во Саудиска Арабија.
Неочекуван раст на инфлацијата во Америка
Откако американската инфлација во јануари порасна повеќе од очекуваното, се огласи и првиот човек на Фед, Џером Пауел. „Иако централната банка направи значителен напредок во обуздувањето на инфлацијата, најновите податоци за потрошувачките цени се доказ дека Фед има уште работа“, изјави Пауел во обраќањето пред Конгресот.
Имено, месечниот индекс на потрошувачките цени во САД порасна во јануари најмногу од август 2023 година, поради растот на цените на храната и гасот, но и зголемените трошоци за домување. Па така, базичната инфлација на месечно ниво порасна во јануари за 0,4 проценти, што е над очекувањата на аналитичарите.
Маск: Америка треба да се грижи за своите работи
Во тек е Светскиот самит на владите во Дубаи, кој ги собира лидерите и бизнисмените од целиот свет. Еден од учесниците на самитот е и Илон Маск, кој учествуваше во дијалогот за иднината на глобалните промени. Во обраќањето преку видеоврска, Маск изјави дека САД треба да се грижат за своите работи кога станува збор за глобалните прашања и дека под администрацијата на Трамп ќе има помал интерес за мешање во внатрешните прашања на другите држави.
БЕРЗИ
Европа
Следува преглед на состојбата на глобалните пазари на капитал. Фјучерсите на европските акции во четвртокот наутро се тргуваа претежно во зелено, пред објавувањето на податоците за индустриското производство во еврозоната. Глобалните пазари на капитал брзо ги занемарија податоците за забрзување на инфлацијата во Америка и го насочија вниманието кон мировниот план на американскиот претседател за прекин на војната во Украина. Истовремено, еврото зајакна во однос на кошницата на водечките светски валути, зајакнувајќи 0,5 проценти во однос на доларот.
САД
Фјучерсите на американските индекси исто така се тргуваат претежно со добивки, и покрај јануарското забрзување на инфлацијата. Инфлацијата во Америка значително порасна на почетокот на годинава, што дополнително ги намалува шансите за повеќекратно намалување на каматните стапки годинава. Имено, годишната инфлација минатиот месец забрза на три проценти, додека аналитичарите прогнозираа инфлација од 2,9 проценти.
Азија
Кога станува збор за акциите во азиско-пацифичкиот регион, тие се тргуваат со добивки, бидејќи разговорот помеѓу Доналд Трамп и Владимир Путин ги зголеми шансите за скорашно завршување на војната во Украина. Најголеми добивки бележат акциите во Јапонија и во Хонгконг, а со добивки се тргуваат и акциите во континентална Кина.
НАФТА
Нафтата ги зголеми загубите, по договорот на Трамп и Путин, бидејќи тоа предизвика шпекулации дека ризиците за руското снабдување би можеле да се намалат. Брентот падна под 75 долари за барел, по падот од 2,4 проценти во средата, а ВТИ (WTI) беше близу 71 долар.
.webp){kind=icon}
